አርዕስተ ዜና

ብሔራዊ የጋራና የተቀናጀ የሳተላይት ቴሌቪዥን ስርጭት ማዕቀፍ ተዘጋጀ Featured

21 Apr 2017
1381 times

አዲስ አበባ ሚያዝያ 13/2009 ኢትዮ-ሳት የተሰኘ ብሔራዊ የጋራና የተቀናጀ የሳተላይት ቴሌቪዥን ሥርጭት ማዕቀፍ ተዘጋጀ።

የኢትዮጵያ ኢንፎርሜሽን መረብ ደህንነት ኤጀንሲ በሳተላይት ቴሌቪዥን ሥርጭት ማዕቀፉ ላይ ዛሬ ከፌዴራልና ከክልል ባለድርሻ አካላት ጋር ተወያይቷል።

ፕሮጀክቱ የሙከራ ሥርጭት ያደረገ ሲሆን ከሚያዝያ 16 ቀን 2009 ዓ.ም ጀምሮ በሙሉ አቅሙ ተግባራዊ ይሆናል።

የኤጀንሲው ዋና ዳይሬክተር ሜጀር ጀኔራል ተክለብርሃን ወልደአረጋይ ማዕቀፉ የተዘጋጀው አገሪቷ በስፔስ ሳይንስ ቴክኖሎጂ ዘርፍ ሉዓላዊነትን ለማስጠበቅ ካላት ፍላጎትና ከሚዲያ ኢንዱስትሪው መስፋፋት ጋር ተያይዞ ተነሳሽነቱን ለማስፋት እንደሆነ ገልጸዋል።

ኢትዮጵያ ጥራቱን የጠበቀ፣ በዋጋው ተመጣጣኝና ለምንም አይነት ጂኦፖለቲካል ተፅዕኖዎች ያልተጋለጠ የሳተላይት ማዕቀፍ እንዲኖራት ያለመ መሆኑንም አብራርተዋል።

የጋራና የተቀናጀ የሳተላይት ቴሌቪዥን ሥርጭት ማዕቀፉ የመገናኛ ብዙሃንን እኩልነት፣ ፍትሃዊነትና ተደራሽነት በማረጋገጥ በመረጃ የበለፀገ ማኅበረሰብ ለመፍጠር የጎላ ሚና እንደሚኖረውም ተናግረዋል።

ኢትዮጵያ እስካሁን የራሷ ሳተላይት ስለሌላት በአገሪቷ የነበሩ ከ15-20 የሚደርሱ የቴሌቪዥን ጣቢያዎች በየግላቸው የዓረብ፣ የናይልና ገልፍ ሳቶችና መሰል የውጭ ሳተላይቶችን ይከራዩ እንደነበር ተገልጿል።

ማዕቀፉ ተግባራዊ ሲሆን ሁሉም የቴሌቪዥን ቻናሎች በአንድ ማዕቀፍ /ፕላትፎርም/ የማሰራጨት ዕድል እንደሚፈጥር ነው የተገለጸው።

የፕሮጀክቱ ኃላፊ ሻለቃ ገብረ መስቀል ተክለማርያም "የማዕቀፉ መዘጋጀት ለሳተላይት የሚከፈለውን የውጭ ምንዛሪ ከመቀነስ ባሻገር ቻናሎቹ ከሚያጋጥሟቸው የደህንነት፣ የተደራሽነት፣ የቴክኖሎጂ፣ ሞገድ አጠቃቀምና የጥራት ውስንነቶችን የሚቀርፍ ነው" ብለዋል።

በአገሪቷ የሚገኙ ሁሉም የህዝብና የመንግስት የቴሌቪዥን ቻናሎች በማዕቀፉ የሚካተቱ ሲሆን በማዕቀፉ መጠቀም ለሚፈልጉ ለአገር ውስጥ የግል የቴሌቪዥን ቻናሎች ግን በፍላጎት ላይ የተመሰረተ እንደሚሆን ተመልክቷል።

ኢትዮ-ሳት የተሰኘው ብሔራዊ የጋራና የተቀናጀ የሳተላይት ቴሌቪዥን ሥርጭት ማዕቀፍ ተደራሽነቱ መካከለኛው ምስራቅ፣ የሠሃራ በታች አገራትና የተወሰኑ የአውሮፓ አህጉርን የሚያካልል ነው ተብሏል።

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->

የውጭ ምንዛሪ መቀየሪያ