አርዕስተ ዜና

በትግራይ መምህራንና ተማሪዎች የሚመዘኑበት አግባብ ያለው ሥርአት ሊዘረጋ ይገባል --- የዘርፉ ምሁራን

12 Aug 2017
86 times

መቀሌ ነሀሴ 6/2009 በትግራይ ክልል የትምህርት ጥራትን ለማስጠበቅ መምህራንና ተማሪዎች በውጤት የሚለኩበት አግባብ ያለው አሰራር ሊዘረጋ እንደሚገባ የዘርፉ ምሁራን አሳሰቡ።

በክልሉ የትምህርት ጥራት ላይ ያተኮረ የምክክር መድረክ ከትላንት ጀምሮ በመቀሌ ከተማ እየተካሄደ ሲሆን ምሁራን በመድረኩ ላይ መፍትሄ የሚያመላክቱ ጥናታዊ ጽሁፎችን አቅርበዋል።

በአዲስ አበባ ዩኒቨርሲቲ የማህበራዊ ሳይንስ መምህር ኃይለስላሴ ወልደገሪማ ባቀረቡት ጽሁፍ "አሁን በክልሉ የትምህርት ጥራት ያለበት ደረጃ ቀጣዩን ትውልድ ለአደጋ የሚያጋልጥ መሆኑን አመላክተዋል።

" ምን ያህል ተማሪዎች ወደ ትምህርት ቤት ገቡ እንጂ ትምህርት ቤት ሂደው የቀሰሙትን እውቀት ክህሎት የሚመዘንበትና የተጠያቂነት አሰራር የለም " ብለዋል፡፡

በተለይ በመጀመሪያ ደረጃ ትምህርት ቤቶች ውስጥ ያለው የተማሪዎች የምዘና ስርአት ለማዳመጥና ለመናገር ችሎታ 70 በመቶ እንዲሁም ለንባብና ለጽህፈት ችሎታ 30 በመቶ ውጤት መስጠቱ ተማሪዎች ማንበብና መጻፍ ሳይችሉ ወደ ቀጣዩ የትምህርት ደረጃ  እንዲሸጋገሩ እያደረገ መሆኑን ገልጸዋል።

በዚህም በአግባቡ ማንበብና መጻፍ ሳይችሉ የሁለተኛ ደረጃ ትምህርት ላይ እንደሚደርሱ የጠቀሱት መምህር ኃይለስላሴ አሰራሩ የትምህርት ጥራትን አደጋ ውስጥ የከተተው መሆኑን አመላክተዋል።

ተጠያቂነትን በሚያሰፍን መልኩና  በውጤት የሚለካ የትምህርት ጥራት ማረጋገጫ ስርአት ካልተዘረጋ የነገ አገር ተረካቢ ትውልድን ለአደጋ ማጋለጥ መሆኑን ከወዲሁ መገንዘብ እንደሚገባ ገልጸዋል።

"ሙያውና ሥራውን ከፍ ለማድረግ በመማርና ማስተማር ሥራው ኃላፊነታቸውን በአግባቡ የማይወጡ ኃላፊዎችና ግለሰቦችን በመለየት  ተገቢ እርምጃዎችን መወሰድ ይገባል" ብለዋል።

"ኩረጃ፣ አለማጥናትና በአግባቡ አለመማር እንደ መልካም ልምድ እየተወሰደ መጥቷል" ያሉት ደግሞ በአዲስ አበባ ዩኒቨርሲቲ የማህበራዊ ሳይንስ መምህር ዶክተር ሙሉ ነጋ ናቸው፡፡

ዶክተር ሙሉ "የባህል ተጽዕኖ በትምህርት ጥራት ላይ " በሚል ርዕስ ባቀረቡት ጥናታዊ ፅሁፍ የትምህርት ጥራትና ተወዳዳሪነትን ለማረጋገጥ ሲባል ፈተና ያላለፈ ተማሪ መድገም እንዳለበት  ሁሉ መምህሩም ተጠያቂ መሆን እንዳለበት ጠቁመዋል።

ሰነፍ ተማሪ መሆን በማህበረሰቡ እንደ መብት ሳይሆን እንደነውር የሚታይበት ባህል እንዲጎለብት ማድረግ ለትምህርት ጥራትና ተወዳዳሪነት አጋዥመሆኑንም ዶክተር ሙሉ አመልክተዋል።

"በአንደኛና ሁለተኛ ደረጃ ትምህርት የዜጎችን ስብዕና የሚቀርጽ ትምህርት መሰጠት አለበት" ያሉት ደግሞ በመቀሌ ዩኒቨርሲቲ የመቀሌ ቴክኖሎጂ ኢንስቲትዩት መምህር ዶክተር ደስታ በርኸ ናቸው፡፡

በተለይ የስነ ምግባርና ስነ ዜጋ፣ የቀመር ትምህርቶች፣ የቋንቋ፣ የታሪክና ባህል፣ ሳይንስና ቴክኖሎጂ ልዩ ትኩረት ሊሰጣቸው እንደሚገባ አስገንዝበዋል።

"ወደ ከፍተኛ የትምህርት ተቋማት የሚገቡ ተማሪዎች ፍላጎትና ችሎታቸውን መሰረት አድርገው እንዲቀጥሉ ማበረታታ ይገባል" ሲሉም ገልጸዋል።

ከውይይቱ ተሳታፊዎች መካከል ዶክተር ከላሊ አድሀና በበኩላቸው "ለትምህርት ጥራት መጓደል መጀመሪያ ተጠያቂ መሆን የሚገባን ራሳችን ነን " ብለዋል፡፡

"በትምህርት ብቁ ያልሆኑና ትምህርታቸውን በአግባቡ ያላጠናቀቁ  መምህራን አስመርቀን እንዴት የትምህርት ጥራትን እንጠብቃለን?" ሲሉም ጠይዋል።

የትግራይ ክልል መምህራን ማህበር ፕሬዚዳንት አቶ ጌታቸው ሞላ በበኩላቸው "መምህራን በትምህርት ብቃታቸውና በመማርና ማስተማር ስራቸው ብቻ ሊመዘኑ ይገባል " ብለዋል፡፡ 

በምክክር መድረኩ ላይ የተገኙት የትግራይ ክልል ርዕሰ መስተዳድር አቶ አባይ ወልዱ  እንደገለጹት በክልሉ በትምህርት ጥራት ላይ ከጊዜ ወደ ጊዜ መሻሻል ቢታይም አሁንም ኩረጃና በትምህርት ብቁ ያልሆነ ዜጋ መበራከት እንደሚስተዋል ተናግረዋል፡፡

የክልሉ መንግስት በየዓመቱ ከሚይዘው በጀት 22 በመቶ ያህሉ ለትምህርት እንደሚመደብ የገለፁት ርዕሰ መስተዳድሩ  "የሚሰጠው ትምህርት ጥራትን መሰረት ካላደረገ ጥፋቱን ተደራራቢ ያደርገዋል" ብለዋል፡፡

በምክክር መድረኩ ላይ ከተለያዩ ከፍተኛ ትምህርት ተቋማት የተውጣጡ ከ100 በላይ ምሁራን ተሳትፈዋል።

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->

የውጭ ምንዛሪ መቀየሪያ