አርዕስተ ዜና

ማህበሩ ለተጎጂ ወገኖች የበኩሉን ድጋፍ እንደሚያደርግ ገለጸ Featured

19 Mar 2017
160 times

 አዲስ አበባ  መጋቢት  10/2009  በአዲስ አበባ ከተማ በኮልፌ ቀራኒዮ ክፍለ ከተማ ወረዳ አንድ በተለምዶ ቆሼ በተባለው አካባቢ የተከሰተውን አደጋ ተከትሎ ለተጎጂዎች ቀጣይነት ያለው ድጋፍ እንዲደረግላቸው የበኩሉን አስተዋጽኦ እንደሚያደርግ የኢትዮጵያ ዲያስፖራ ማህበር ገለጸ።

የማህበሩ አባላት ዛሬ በአካባቢው በመገኘት በአደጋው የተጎዱ ነዋሪዎችን ጎብኝተዋል፤ ሐዘን ላይ ያሉ ቤተሰቦችንም አጽናንተዋል።

በአደጋው ሳቢያ 113 ሰዎች ሕይወታቸውን  አጥተዋል። ብዙዎቹ ከቤት ንብረታቸው ተፈናቅለው በመጠለያ ውስጥ ለመኖር ተገደዋል።

እነዚህን ተጎጂዎች ለመታደግና ዘላቂ መፍትሄ ለመስጠት ከከተማው አስተዳደር ጀምሮ የተለያዩ የህብረተሰብ ክፍሎች፣ ተቋማትና ድርጅቶች የበኩላቸውን አስተዋጽኦ እያደረጉ ይገኛሉ።

በተለያዩ ጊዜያት በአካባቢው ላይ ተገኝተው ጉብኘት ያደረጉና አጋርነታቸውን ያሳዩ የህብረተሰብ አባላት ተጎጂዎችን መልሶ የማቋቋምና ዘላቂ መፍትሄ የመስጠት ጉዳይ በርብርብ እንዲሰራ ይጠይቃሉ።

የኢትዮጵያ ዲያስፖራ ማህበር ዳይሬክተር አቶ አብረሃም ስዩም እንደተናገሩት፤ አደጋው አስደንጋጭና አስከፊ በመሆኑ የኢትዮጵያን ህዝብ በእጅጉ አሳዝኗል።

በተከሰተው  አደጋ ለተጎዱ ወገኖች ዘላቂ መፍትሄ ለመስጠት ርብርቡ መቀጠል እንዳለበት ያመለከቱት አቶ አብርሃም፤ ማህበሩ ተጎጂዎችን መልሶ በማቋቋም ተግባር ከመንግስት ጎን በመቆም ድጋፍ  እንደሚያደርግ ነው የተናገሩት።  

እንደእርሳቸው ገለጻ፤ ማህበሩ ከመንግስት ጎን በመሆን ለተጎጂዎች ሁለገብ ድጋፍ ለማድረግ አቅዷል።

በማህበሩ የሴቶች ፎረም አስተባባሪ ወይዘሮ ኤፍራታ ለማ በበኩላቸው፤ በአደጋው የተጎዱ ሰዎችን መልሶ ለማቁቁም በሚደረገው ጥረት በውጪ የሚገኙና በአገር ውስጥ ያሉትን ዲያስፖራዎች በማስተባበር ገቢ የማሰባሰብ ስራዎችን እየተሰራ መሆመኑን ተናግረዋል።

በዚህም የሚደረገው ድጋፍ ተጎጂዎችን ከማጽናናት ባለፈ መልሶ በማቁቁምና ረገድ ማህበሩ የራሱን አስተዋጽኦ ለማድረግ እንደሚችል  ጠቁመዋል።

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

የውጭ ምንዛሪ መቀየሪያ