አርዕስተ ዜና

መንግስት ለወጣቶች ያመቻቸው ተዘዋዋሪ ፈንድ ለተፈለገው ዓላማ እንዲውል መረባረብ ይገባል--- ምክትል ጠቅላይ ሚኒስትር ደመቀ መኮንን Featured

17 Feb 2017
697 times

አዳማ የካቲት 10/2009 መንግስት ለወጣቶች ያመቻቸው ተዘዋዋሪ ፈንድ ለታለመለት ዓላማ በማዋል የልማቱ ተሳታፊና ተጠቃሚነቸው እንዲረጋገጥ  መረባረብ እንደሚገባ ምክትል ጠቅላይ ሚኒስትር ደመቀ መኮንን አሳሰቡ።

በተዘዋዋሪ ፈንዱ አጠቃቀም ዙሪያ ለባለድርሻ አካላት ዛሬ በአዳማ ከተማ በተዘጋጀው መድረክ ላይ የተገኙት ምክትል ጠቅላይ ሚኒስትሩ  እንዳስታወቁት ባለፉት ዓመታት የወጣቶችን ፓኬጅ መሰረት ያደረገ ሰፊ የልማት እንቅስቃሴ ሲደረግ ቆይቷል፡፡

ሆኖም የሚፈለገውን ያህል ባለመሰራቱ ወጣቱን ማርካት አልተቻለም።

ከነበሩ ጠንካራና ደካማ ጎን በመነሳት ሁሉንም ስራ አጥ ወጣቶች ተጠቃሚ ማድረግ እንዲቻል በየደረጃው የመለየት፣ የማደረጃት፣ የክህሎትና  ሙያዊ ስልጠና በመስጠት  ወደ ተግባር መግባት ይገባል፡፡

ምክትል ጠቅላይ ሚኒስትሩ በማያያዝም "የወጣቱን የሥራ አጥነት ችግር ለመፍታት በተጓዝንበት ተመሳሳይ አሰራር ጥያቄዎችን መመለስ አይቻልም ፤በዋና ዋና የተግባር ምዕራፍ ውስጥ በመግባት የገንዘብና የግብዓት አቅርቦቱን ማፋጠን ይጠበቅብናል" ብለዋል።

የወጣቶችን ማህበራዊና ኢኮኖሚያዊ ተሳትፎና ተጠቃሚነትን የሚገድቡ ኪራይ ሰብሳቢነትን የመሳሰሉ ችግሮች መፈታት አለባቸው፡፡

መንግስት ያመቻቸው የወጣቶች ተዘዋዋሪ ፈንድ ለተፈለገው ዓላማ እንዲውል በፌዴራልና በክልል ያሉ የወጣቶች አደረጃጀት ፣ ባንኮች፣ የማይክሮ ፋይናንስ ተቋማትና ሌሎችም የባለድርሻ አካላት በአጠቃቀሙ መመሪያ ላይ ግልፅ ግንዛቤ ይዘው እንዲረባረቡ አሳስበዋል።

የወጣቶችና ስፖርት ሚኒስትሩ አቶ ርስቱ ይርዳው እንዳስረዱት በአሁኑ ወቅት ከ2 ነጥብ 9 ሚሊዮን በላይ የስራ አጥ ወጣቶች በከተማና ገጠር ተለይተዋል።

የተለየቱንም ወጣቶች ለማደራጀት፣  ስልጠና ለመስጠት ፣ የስራ እቅድ ፣የመስሪያና መሸጫ ቦታ አቅርቦትና  የተዘዋዋሪ ብድር አገልግሎቱ የተቀላጠፈ ለማድረግ ዝግጅት እየተጠናቀቀ እንደሚገኝ አመልክተዋል።

በወጣቶች ተዘዋዋሪ ፈንድ አሰራር መመሪያና አጠቃቀም ላይ ከሁለቱ የከተማ መስተዳድሮችና ከዘጠኝ ክልሎች ከተወጣጡ የሚለከታቸው  አካላት  ጋር በአዳማ  የተካሄደው  መድረክ የዝግጅቱ  አካል መሆኑን ጠቅሰዋል፡፡

ወጣቶችን ወደ ስራ ለማስገባት በክልሎች የተደራጀው ግብረ ሃይል እስከ ቀበሌ ድረስ በመውረድ ጠንካራ ድጋፍና ክትትል በማድረግ ወደ ተግባር መግባት እንዳለበትም  ጠቁመዋል።

አሁን በዘርፉ  የሚስተዋለው የስራ አጥ ወጣቶችን ቁጥር በውል በመለየት ላይ ያለውን ክፍተት  ለማስተካከል የተጠናከረ ስራ እንደሚጠይቅም  አመልክተዋል።

የብሔራዊ ባንክ ገዥ አቶ ተክለወልድ አጥናፍ እንዳመለከቱት የወጣቶች የስራ አጥነትን ቁጥር ለመቀነስ  በፈጣን ዕድገት ውስጥ ተዋናይና ተጠቃሚ የሚሆኑበት አማራጮችን ማስፋት ወሳኝ ነው፡፡

አሁን ላይ ጎልቶ የወጣውን የስራ አጥነት ችግር ዘላቂ መፍትሄ እንዲያገኝ መንግስት በአዋጅና በመመሪያ የተደገፈ የህግ ማዕቀፍ መዘርጋቱን ጠቅሰው "የሚቀረው ተጨባጭ ስራ ውስጥ መግባት ብቻ ነው "ብለዋል።

በገጠርና በከተማ ከ18 እስከ 34 ዕድሜ ውስጥ የሚገኙ 18 ሺህ ቀበሌዎች ውስጥ ከ30 ሚሊዮን በላይ ወጣቶች እንዳሉ የጠቀሱት አቶ ተክለወልድ አዳዲስ የስራ አማራጮችን በማስፋፋት ተደራሽነታቸውን ማረጋጋጥ እንሚጠበቅም ጠቁመዋል።

የተዘዋዋሪ ብድር አቅርቦት ተደራሽነቱን ለማረጋገጥ ከሦስት ሺህ 900 በላይ የንግድ ባንክ ቅርንጫፎችና አንድ ሺህ 700  የማይክሮ ፋይናንስ ተቋማት መዘጋጀታቸውንም ጠቅሰዋል፡፡

" ድህነትን በ16 በመቶ ለመቀነስ መንግስት የያዘውን ግብ ለማሳካት በሁሉም መስኮች የወጣቶችን ተሳትፎና ተጠቃሚነት ማረጋገጥ አለብን" ያሉት ደግሞ የኢትዮጰያ ንግድ ባንክ ፕሬዘዳንት አቶ በቃሉ ዘለቀ ናቸው፡፡

የንግድ ባንኩ ፈንዱን ማስተዳደር ብቻ ሳይሆን በብድር አገልግሎቱ ላይ በሙሉ አቅሙ እንደሚሰራ አረጋግጠዋል።

ባንኮችና የማይክሮ ፋይናንስ ተቋማት ውስጥ ወጥነት ያለው አሰራር ተግባራዊ እንዲደረግ የሚረዳ መመሪያ እንዳለም ጠቅሰዋል፡፡

ለአንድ ቀን በተዘጋጀው መድረክ ላይ  የወጣቶች አደረጃጀቶች፣የማይክሮ ፋይናንስ ተቋማት፣ባንኮች፣የጥቃቅንና አነስተኛ ማይክሮ ኢንተርፕራይዝ ልማት ኤጄንሲዎች ፣ የወጣቶችና ስፖርት ቢሮ አመራሮች ተሳትፈዋል።

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->

የውጭ ምንዛሪ መቀየሪያ