አርዕስተ ዜና

በመቀሌ ከተማ የሚታየውን የንጹህ መጠጥ ውሃ አቅርቦት ችግር ለማቃለል የተቀናጀ ጥረት ይደረጋል

11 Jan 2017
361 times

መቀሌ ጥር 3/2009 በመቀሌ ከተማ የሚታየውን የንጹህ መጠጥ ውሃ አቅርቦት ችግር ለማቃለል በሚቀጥሉት ሶስት ወራት የተቀናጀ ጥረት ይደረጋል- አቶ አባይ ወልዱ

ርዕስ መስተዳደሩ የገረብ ሰገን ግድብ ግንባታንና የመቀሌ ኢንዱስትሪ ፓርክን ትናንት ጎብኝተዋል፡፡

በጉብኝቱ ወቅት የክልሉ የውሀ ግንባታ ስራዎች ኢንተርፕራይዝ ስራ አስኪያጅ አቶ ገብረመድህን ተስፋዬ እንደገለጹት ከ33 ሚሊዮን ሜትር ኩብ በላይ ውሃ የመያዝ አቅም ያለው የገረብ ሰገን ግድብ ግንባታ የተጀመረው በ2006ዓ.ም ነው፡፡

በአሁኑ ወቅት  ግንባታው  በአብዛኛው ተጠናቆ  በቂ ውሀ ማከማቸቱን አመልክተው ከግድቡ በታች የሚሰሩ የውሀ ማከሚያዎች፣የመስመር ዝርጋታና ሌሎች ተጓዳኝ ስራዎች በሂደት ላይ እንደሚገኙ ጠቁመዋል፡፡

የውሀ ማጠሪያና የውሀ መስተላለፊያ ቱቦዎች  ከአውሮፓና ከቻይና የሚመጡ በመሆናቸው አቅራቢዎች በወቅቱ ባለማድረሳቸው እንዲሁም በየጊዜው የዲዛይን መቀያየር ምክንያት ግንባታውን እንዳጓተተው ተጠቅሷል፡፡

ለግድቡ ግንባታ ከግማሽ ቢሊዮን ብር በላይ ወጪ እንደተደረገበት ያመለከቱት  አቶ ገብረመድህን ፕሮጀክቱ ሲጠናቀቅ በመጀመሪያው ምዕራፍ  በዓመት ከሰባት ነጥብ አምስት ሚሊዮን በላይ ሜትር ኩብ ውሀ ለከተማው ማቅረብ እንደሚቻል ገልጸዋል፡፡

ፕሮጀክቱ ለመጠጥ ውሃ ብቻ ሳይሆን በአካባቢው የሚገኙ አርሶ አደሮችንም ተጠቃሚ የሚያደርግ 600 ሄክታር መሬት በመስኖ የሚያለማ መሆኑን ጠቁመዋል፡፡

ርዕሰ መስተዳደሩ  አቶ አባይ ወልዱ በጉብኝቱ ወቅት እንዳሉት፣ በመቀሌ ከተማ የሚታየውን የንጹህ መጠጥ ውሃ አቅርቦት ችግር በሚቀጥሉት ሶስት ወራት ውስጥ መፍትሄ እንዲያገኝ የተቀናጀ ጥረት ይደረጋል፡፡

እቃ ለማቅረብ ጨረታ ያሸነፉ አቅራቢዎች በገቡት ውል መሰረት እንዲፈጽሙ  ክትትል በማድረግ  ቀሪ ስራዎች እንዲጠናቀቁ የስራ መመሪያም ሰጥተዋል፡፡

ርዕሰ መስተዳድሩ በተጨማሪም በመቀሌ ከተማ አካባቢ በመገንባት ላይ ያለውን የኢንዱስትሪ ፓርክ ሲጎበኙ የፓርኩ ፕሮጀክት ተጠሪ አቶ ዘካሪያስ ገብረአነኒያ " እስከ የካቲት 20/2009 ዓ.ም  ድረስ ለማጠናቀቅ ተቋራጩ ጥረት እያደረገ ነው "ብለዋል፡፡

በኢንዱስትሪ ፓርኩ ከሚገነቡ 15 ሼዶች ውስጥ ስድስቱ ጣራቸው መልበሱን ጠቁመው ቀሪዎቹ ደግሞ በተለያዩ የግንባታ ምዕራፍ ላይ እንደሚገኙ ገልጸዋል፡፡

ፕሮጀክቱ ሲጠናቀቅ  ለበርካታ ዜጎች የስራ እድል እንደሚፈጥርም ተመልክቷል፡፡

 

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->

የውጭ ምንዛሪ መቀየሪያ