አርዕስተ ዜና

የኢትዮ - ሱዳን የድንበር ልማት ኮሚሽን ጉባኤ በመቀሌ ተጀመረ Featured

17 Feb 2017
199 times

መቀሌ የካቲት 10/2009 ኢትዮጵያና ሱዳን በጋራ ጉዳዮቻቸው ላይ አብረው መስራታቸው በድንበር ላይ ለሚኖሩ የሁለቱ አገራት ሕዝቦች ግንኙነትና ሰላም መጎልበት አስተዋጽኦ እያደረገ መሆኑ ተጠቆመ።

የኢትዮ - ሱዳን የድንበር ልማት ኮሚሽን 18ኛ መደበኛ ጉባኤ ዛሬ በመቀሌ ሰማዕታት ሃውልት መሰብሰቢያ አዳራሽ ተጀምሯል።

በጉባኤው ላይ የተገኙት የትግራይ ክልል ርዕሰ መስተዳድር አቶ አባይ ወልዱ የኢትዮጵያና የሱዳን ሕዝቦች በቋንቋ፣ በታሪክ፣ በባህልና በተፈጥሮሃብት የተሳሰሩ ሕዝቦች መሆናቸውን ገልጸዋል፡፡

ለረዥም ዓመታት በጋራ ትብብርና በመተማመን ላይ የተመሰረተ ግንኙነት ያላቸው ወንድማማች ሕዝቦች መሆናቸውንም አስታውሰዋል።

አገሮቹ በጋራ ለመልማትና ለማደግ ካለቸው ፍላጎት የተነሳ በተለያዩ የመሰረተ ልማት አውታሮች ለመተሳሰርና ችግሮቻቸውን በጋራ ለመፍታት እየሰሩ መሆኑንም ተናግረዋል።

አቶ አባይ እንዳሉት፣ ኢትዮጵያና ሱዳን ዲፕሎማሲያዊና ወንድማዊ ግንኙነታቸውን በማጠናከር በጋራ ጉዳዮቻቸው ላይ አብረው መስራታቸው በድንበር ላይ የሚኖሩ ሕዝቦቻቸው ግንኙነትና ሰላም በየጊዜው እየጎለበተ እንዲመጣ አድርጓል።   

"በቀጣይ አገሮቹን በንግድ፣ በቱሪዝም ልማት፣ በጤናና በሌሎች ማህበራዊ ጉዳዮች ያለቸውን ግንኙነት ለማጠናከር ተጨማሪ ሥራ መስራት ይጠበቅብናል" ብለዋል፡፡

ከእዚህ በተጨማሪ ህገወጥ የሰዎች ዝውውር፣ ድንበር ላይ የሚካሄዱ የኮንትሮባንድ ንግድና የተፈጥሮ ሀብት ዘረፋን በመከላከል የሁለቱ አገሮች ሕዝቦችን ጥቅም ለማረጋገጥ በጋራ መስራት እንደሚገባ አመልክተዋል።

"ጉባኤው የአገሮቹን የኢንቨስትመንት እንቅስቃሴ በማጠናከርና እርስ በርስ የልማት አጋር በመሆን የኢኮኖሚ ዕድገትን ቀጣይነት ባለው መልኩ የምናረጋግጥበት ጭምር መሆን አለበት" ብለዋል አቶ አባይ።

በሱዳን የገዳሪፍ ክልል አስተዳዳሪና የልዑካን ቡዱኑ መሪ ሚስተር ማርቀኒ ሳልሕ ሰዒድ በበኩላቸው፣ ሁለቱም አገሮች ለሕዝቦቻቸው እድገትና ልማት በጋራ ተባብረው እየሰሩ መሆናቸውን ገልጸዋል።

በድንበር በሚዋሰኑት የሁለቱ አገሮች አጎራባች ክልሎች የተጠናከረ የሕዝብ ለሕዝብ ግኙኝነት እንዲኖራቸውና ህገ ወጥ የሰዎቸ ዝውውርን ለመግታት እየተሰራ መሆኑን ተናግረዋል፡፡

የኮንትሮባንድና ህገ ወጥ ንግድን ለመከላከል በጋራ ጥረት እየተደረገ ቢሆንም፣ የአገራቱ የፖሊስና የፀጥታ አካላት ተባብረውና ጠንክረው እንዲሰሩ በማድረግ ህገ ወጥ ንግድንና የሰዎች ዝውውርን ለመግታት ተጨማሪ ጥረት ማድረግ እንደሚገባ ገልጸዋል።

"የሱዳን ሃብት ኢትዮጵያውያን እንዲጠቀሙበት በራችን ክፍት ነው፤ እኛ ደግሞ የእናንተን ሃብት እንጠቀማለን።" ያሉት ሚስተር ማርቀኒ፣"በድንበር አካባቢ ሰላም በማስፈንና የህዝቦችን ግኑኝነት በማጠናከር ለሌሎች አገሮች ሞዴል ሆነን መቀጠል አለብን" ብለዋል።

ለሁለት ቀናት በሚካሄደው በእዚህ ጉባኤ  ሁለቱ አገሮች በሚዋሰኑባቸው ድንበሮች ያለውን የሰላምና ፀጥታ ጉዳይ፣ የሕዝብ ለሕዝብ ግንኙነት ለማጠናከር እንዲሁም በማህበራዊና ኢኮኖሚያዊ ዘርፎች የተከናወኑ ሥራዎች ይገመገማሉ፡፡

ጉባኤው በእስካሁኑ ሂደት የነበሩ ጠንካራና ደካማ ጎኖችን በመገምገም በቀጣይ መከናወን በሚገባቸው ሥራዎች ላይም ይወያያል ተብሎ ይጠበቃል።

ለጉባኤው የመጣው የሱዳን ልዑካን ቡድን ነገ በመቀሌ በሚከበረው 42ኛው የህወሓት በዓል ላይ ይሳተፋል ተብሎ እንደሚጠበቅ የዘገበው የኢትዮጵያ ዜና አገልግሎት ነው።

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

የውጭ ምንዛሪ መቀየሪያ