አርዕስተ ዜና

ፕሮጀክቱ 12 ሚሊዮን ነዋሪዎችን ተጠቃሚ አድርጓል

10 Feb 2017
717 times

አዲስ አበባ የካቲት 2/2009 የኦሮሚያ ክልል ባሌና ምዕራብ አርሲ ዞኖችን ስነ-ምህዳር ለመጠበቅ ሲተገበር የቆየው ሼር የተሰኘ ፕሮጀክት 12 ሚሊዮን የአካባቢ ነዋሪዎችን ተጠቃሚ ማደረጉ ተገለጸ።  

ዓለም አቀፉ የውኃ ማኔጅመንት ኢንስቲትዩት የፕሮጀክቱን አፈጻጸም አስመልክቶ ከባለድርሻ አካላት ጋር ያዘጋጀው አውደ ጥናት ዛሬ ተካሂዷል። 

በፕሮጀክቱ የተገኙ ውጤቶች፣ የተከናወኑ ተግባራት፣ ያጋጠሙ ችግሮችና ቀጣይ አቅጣጫዎች ለተሳታፊዎች ቀርበዋል።

የፕሮጀክቱ ዓላማ እየጨመረ የመጣው የህዝብ ብዛት በባሌ አካባቢ ስነ-ምህዳር ላይ የሚያደርሰውን ጉዳት በጥናት በመለየት የመፍትሄ እርምጃዎች እንዲወሰዱ ማድረግና የአካባቢውን ነዋሪዎች የኑሮ ሁኔታ ማሻሻል ነው። 

ለፕሮጀክቱ ማስፈጸሚያ ከአውሮፓ ኅብረት የተገኘ 5 ነጥብ 5 ሚሊዮን ዩሮ  የተመደበ ሲሆን በ40 ወራት ለማጠናቀቅ መታቀዱም በአውደ ጥናቱ ላይ ተገልጿል።      

ፋርም አፍሪካ፣ ኤስ ኦ ኤስ ሳህል፣ ዓለም አቀፉ የውኃ ማኔጅመንት ኢንስቲትዩት፣ ፍራንክፈርት ዞሎጂካል ሶሳይቲና ፖፑሌሽን ሄልዝ ኢንቫይሮመንት ኢትዮጵያ የተሰኙ ተቋማት ፕሮጀክቱን በጋራ ከውነውታል። 

የውኃ አጠቃቀምና የስነ-ምህዳር አገልግሎትን ተደራሽ ማድረግ፣ የእንስሳት ኃብት፣ የቤተሰብ እቅድ አገልግሎት፣ የአካባቢውን ነዋሪዎች የገቢ ምንጭ የሚያሳድጉ ተግባራትን ማከናወን በፕሮጀክቱ ጥናት የተካተቱ ጉዳዮች ናቸው።

የፕሮጀክቱ አስተባባሪ አቶ አሳየ አስናቀ እንደገለጹት ፕሮጀክቱ ሲተገበር በቆየባቸው ዓመታት የአካባቢውን ነዋሪዎች ተጠቃሚ ያደረጉ ውጤቶች ተገኝተዋል። 

12 ሚሊዮን ዜጎችን የንጹህ መጠጥ ውኃና የመስኖ አገልግሎት ተጠቃሚ ማድረግ መቻሉን ለአብነት ጠቅሰዋል። 

በአጠቃላይ በፕሮጀክቱ ከ873 ሺህ በላይ ነዋሪዎች ቀጥተኛ ተጠቃሚ ሲሆኑ 12 ሚሊዮን ደግሞ ቀጥተኛ ባልሆነ መንገድ ተጠቃሚ መሆናቸውን አስረድተዋል። 

ከአቅም ግንባታ አኳያም ለመንግሥት ሰራተኞችና ፈጻሚዎች በአካባቢ ጥበቃና ከእንስሳት ኃብት ዘርፍ የሚገኘውን ጥቅም ማሳደግ በሚቻልበት ዙሪያም ስልጠናዎች ተሰጥተዋል።   

እንደ አስተባባሪው ገለጻ በሰብል አምራች አካባቢዎች ለሚገኙ አርሶ አደሮች የአመራረት ሂደታቸውን የሚያሳድጉ ድጋፎችም ተደርገዋል።

"በዚህም የአካባቢው የሰብል ምርት መጠን በ2 ነጥብ 3 በመቶ ጨምሯል" ነው ያሉት።     

የባለድርሻ አካላት የቅንጅት ችግር፣ የደን መጨፍጨፍና የአካባቢው ህዝብ ቁጥር መጨመር ካጋጠሙ ችግሮች መካከል መሆናቸውንም አቶ አሳየ ጠቅሰዋል።

የኢንስቲትዩቱ የናይል ቤዚንና የምስራቅ አፍሪካ ቢሮ ኃላፊ ዶክተር አማረ ኃይለስላሴ በበኩላቸው ኢንስቲትዩቱ ፕሮጀክቱ ውጤት እንዲያመጣ የማስተባበር ሚናውን ሲወጣ መቆየቱን ተናግረዋል።

በባሌ አካባቢ ተፈጥሮ ኃብትና የሰዎች አኗኗር ዘዴ፣ ስነ-ምህዳሩ ለአካባቢው ነዋሪዎች የሚሰጠው አገልግሎትና በቤተሰብ እቅድ አገልግሎት ዙሪያ የተለያዩ ጥናቶች መካሄዳቸውንም አብራርተዋል።

የጥናት ውጤቱን መሰረት አድርጎ የመንግሥት ፖሊሲ አውጪዎች በቀጣይ ለሚሰሩት ስራ ግብዓት የሚሆኑ ውጤቶች መገኘታቸውን ጠቁመዋል።

የአካባቢውን ተጠቃሚነት ለማረጋገጥ በሚደረገው ጥረት መንግሥት መሰል የፕሮጀክት ጥናት ውጤቶችን ወደ ተግባር መቀየር ይኖርበታል ሲሉም አመልክተዋል።

ኢንስቲትዩቱ በቀጣይም በዘርፉ የአገሪቱን ተጠቃሚነት ለማሳደግ ከመንግሥት ተቋማት፣ ከዩኒቨርሲቲዎች፣ መንግስታዊ ካልሆኑ ተቋማትና ከጥናትና ምርምር ተቋማት ጋር እንደሚሰራ አረጋግጠዋል።

አውደ ጥናቱ ነገም ቀጥሎ እንደሚውል የወጣው መርኃ ግብር ይጠቁማል። 

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->

የውጭ ምንዛሪ መቀየሪያ