አርዕስተ ዜና
Items filtered by date: Monday, 19 June 2017

አዲስ አበባ ሰኔ 12/2009 አገር አቀፍ የፖለቲካ ፓርቲዎች ከኢትዮጵያ ህዝቦች አብዮታዊ ዴሞክራሲያዊ ግንባር ጋር ለመደራደሪያነት ካቀረቧቸው 13 ርዕሰ ጉዳዮች መካከል አራቱን ዛሬ አጸደቁ፡፡

ሰኔ 7 ቀን 2009 ዓ.ም  ባካሄዱት ውይይት የምርጫ አዋጁን በተመለከተ ለመደራደር የተስማሙ ሲሆን፤ በአጠቃላይ በጋራ ያጸደቋቸው የመደራደሪያ አጀንዳዎች ወደ አምስት ደርሰዋል፡፡

የተለያዩ አዋጆችና ህጎች፣ ብሔራዊ መግባባት፣ የዴሞክራሲዊና ሰብዓዊ ተቋማት አደረጃጀት እንዲሁም ዜጎች በየትኛውም ክልል ተዘዋውረው የመስራት፣ ንብረት የማፍራትና የመደራጀት መብትን በሚመለከት የተቀመጡ የመደራደሪያ አጀንዳዎችን ፖለቲካ ፓርቲዎቹ ዛሬ አጽድቀዋል፡፡

የአስቸኳይ ጊዜ አዋጁን በሚመለከት ባነሱት ሀሳብ ተፎካካሪ ፓርቲዎቹ የአገሪቷን ኢኮኖሚያዊ እንቅስቃሴ የሚያዳክም እንደሆነ ገልጸዋል።

ኢህአዴግ በበኩሉ፤ አገሪቷ በአስቸኳይ አዋጅ ውስጥ ሆና ስለአዋጁ መወያየት አግባብ እንዳልሆነ ገልጾ፤ አዋጁ ግን በምንም አግባብ የአገሪቷ ኢኮኖሚ ላይ ተጽዕኖ እንዳላመጣ ጠቁሟል፡፡

ሌላው ሰፊ ክርክር የወሰደው “የፓለቲካ እሰረኞች አሉ ወይስ የሉም” የሚለው ሀሳብ ሲሆን፤ ተፎካካሪ ፓርቲዎች ጉዳዩ የድርድር አጀንዳ እንዲሆን ጠይቀዋል።

ኢህአዴግ በበኩሉ፤ በአገሪቷ ውስጥ የፖለቲካ እሰረኛ እንደሌለ ገልጾ፤ በፖለቲካ ውስጥ የነበሩ ቢሆንም የታሰሩት ህግን የተላለፉ መሆናቸውን አስረድቷል።

''ይህ ደግሞ የዴሞክራሲ አንዱ መገለጫ የሆነው የህግ የበላይነት በአገሪቷ ውስጥ እንደሰፈነ ማሳያ ነው'' ብሏል።

የፖለቲካ ፓርቲዎቹ በተከራከሩባቸውና ኢህአዴግ ባልተቀበላቸው የመደራደሪያ አጀንዳዎች ላይ ድጋሚ ተወያይቶ ለመተማመን ለሰኔ 17 ቀን 2009 ዓ.ም ቀጠሮ ተይዟል።

በአገሪቷ ውስጥ በህጋዊነት የሚንቀሳቀሱ የፖለቲካ ፓርቲዎች ከገዥው ፓርቲ ኢህአዴግ ጋር ለመደራደር እንቅስቃሴ ከጀመሩበት ቀን አንስቶ  ከአስር ጊዜ በላይ ውይይት አካሄደዋል።

Published in ፖለቲካ

አዳማ ሰኔ 12/2009 ፌደራሊዝም ዴሞክራሲያዊ የህዝብ ስልጣን ባለቤትነትን ያረጋገጠ ስርዓት መሆኑን በአርሲ ዩኒቨርስቲ አስተያየታቸውን ለኢዜአ የሰጡ ምሁራን ገለጹ፡፡

የዩኒቨርስቲው የስነ ዜጋና ስነ ምግባር መምህር አቶ ስሜ የኋላሸት እንደገለጹት  የፌደራል ሥርዓቱ የሀገሪቱ ህዝቦች የጋራ በሆኑት ጉዳዮች ላይ በመተማመንና በመግባባት በልማቱ እኩል እንዲሳተፉ ዕድል የሰጠ ነው።

"ከ40 በመቶ በላይ የዓለም ሀገራትና ህዝቦች በፌደራሊዝም ስርዓት ይተዳደራሉ"  ያሉት አቶ ስሜ የኢትዮጵያን ለየት የሚያደርገው የብሔሮች ብሔረሰቦችና ህዝቦች አሰፋፈር፣ባህልና ቋንቋን መሰረት በማድረግ እኩል ተሳትፎና ተጠቃሚነትን በማረጋገጡ መሆኑን ተናግረዋል፡፡

የፌደራል ሥርዓቱ በክልሎች መካከል ጤናማና በመተማመን ላይ የተመሰረተ መልካም ጉርብትናና የጋራ ልማት እንዲኖር በማድረግ የሀገሪቱን  ታሪክ መቀየሩንም  ጠቅሰዋል፡፡

"የሃይማኖት ነፃነት፣የዜጎች ሰብዓዊና ዴሞክራሲያዊ መብት ያለገደብ የተከበረባት ሀገር ለመገንባት የፌደራልዝም ሥርዓቱ መሰረት ነው "ያሉት ደግሞ በዩኒቨርሲቲው የተቋማዊ ለውጥ ምክትል ዲን አቶ ሙስበሃ አማን ናቸው።

ህዝቦች የራሳቸውን ዕድል በራስ የመወሰን እስከ መገንጠል ህገ መንግስታዊ መብትና ዋስትና ያገኙበት፣አካባቢያቸውን እንዲያስተዳድሩና እንዲያለሙ፣ባህልና ቋንቋቸውን እንዲያሳድጉ ምቹ ሁኔታ ፈጥሯል፡፡

ምሁሩ እንዳመለከቱት የአሁኑ ትውልድ በሥርዓቱ የተገኙ ማህበራዊ፣ኢኮኖሚያዊና ፖለቲካዊ ውጤቶችን የራሱን ተሳትፎና ተጠቃሚነት ሊያረጋግጥ በሚችል መልኩ ማስቀጠል አለበት።

በዩኒቨርሲቲው ጠቅላላ አገልግሎት አስተዳደር ዳይሬክተር አቶ አሳልፍ ኮኮብ በበኩላቸው ስርዓቱ ዜጎች በራሳቸው መብትና ጥቅም ላይ በጋራ ሆነው በእኩልነት የመወሰን ስልጣን እንዲያገኙ ያስቸለ መሆኑን ገልጸዋል፡፡ 

ሞጋችና መብት ጠያቂ ህብረተሰብ መፈጠሩ የሥርዓቱ ውጤት ቢሆንም በመልካም አስተዳድር ማስፈን፣በፍትህና የህግ የበላይነት ማረጋገጥ ላይ አሁንም በትኩረት ሊሰራ እንደሚገባ ጠቁመዋል፡፡

ሥርዓቱ  አርሶና አርብቶ አደሩን ጨምሮ የሌሎችንም ዜጎች የኑሮ ሁኔታ እንዲለውጥ ምቹ ሁኔታ መፍጠሩን የገለጹት ደግሞ በዩኒቨርሲው የአስተዳደርና የልማት ዘርፍ ምክትል ፕሬዘዳንት ዶክተር ገዘኸኝ ጉርሙ ናቸው፡፡ 

"በማህበራዊ አገልግሎት በተለይም የመጀመሪያና ሁለተኛ ደረጃ፣የከፍተኛ ትምህርት ተቋማት ማስፋፋት፣የቴሎኮም አገልግሎት ተደራሽነት፣የጤና፣የንፁህ መጠጥ ውሃ አቅርቦትና የመንገድ ልማት የፌደራል ሥርዓቱ ውጤቶች ናቸው" ብለዋል።

ፌደራሊዝም የነበረውን አሃዳዊ የፖለቲካ መደብ ወደ ዴሞክራሲያዊ የህዝብ ስልጣን ባለቤትነት በማሸጋገር ዜጎች በሁሉም መስክ እኩል ተሳታፊና  ተጠቃሚ እንዲሆኑ ምቹ መደላድል መፍጠሩን   ምሁራኑ ገልጸዋል፡፡

Published in ፖለቲካ

አዲስ አበባ ሰኔ 12/2009 ኢትዮጵያ በኳታርና በባህረ ሰላጤው አገሮች መካከል ሰላም እንዲሰፍን የበኩሏን እንደምትወጣ አረጋገጠች።

የውጭ ጉዳይ ሚኒስትር ዶክተር ወርቅነህ ገበየሁ ከጠቅላይ ሚኒስትር ኃይለማርያም ደሳለኝ የተላከውን መልዕክት ለኩዌት አሚር ሼክ ሳባህ አል አህመድ አል ጃበር አል ሳባህ አቅርበዋል።  በአገሮቹ የሁለትዮሽ ግንኙነት ላይም ተወያይተዋል።

ዶክተር ወርቅነህ ከአሚሩ ጋር በተወያዩበት ወቅት እንደገለጹት፤ ኢትዮጵያ በኳታር እና በባህረ ሰላጤው አገሮች መካከል የተከሰተው ውዝግብ በዲፕሎማሲያዊ መንገድ እንዲፈታ ጽኑ ፍላጎት አላት።

ኩዌት ሁለቱን ወገኖች ለማደራደር የምታደርገውን ዲፕሎማሲያዊ ጥረት ኢትዮጵያ እንደምትደግፍ ጠቁመው፤ ጥረቱ ስኬታማ እንዲሆን የበኩሏን አስተዋጽኦ ለማድረግ  ፍላጐቱ እንዳላት አብራርተዋል።

የኩዌቱ አሚር ሼክ ሳባህ በበኩላቸው፤ ኢትዮጵያ ከጥንት ጀምሮ የዓረቡ ዓለም በተለይም የኩዌት ወዳጅ መሆኗን አስታውሰው፤ አሁንም ችግሩ በውይይት እንዲፈታ ከአፍሪካ ቀዳሚ አገር በመሆን ለምታደርገው ድጋፍ ምስጋናቸውን አቅርበዋል።

በባህረ ሰላጤው የተከሰተው ሁኔታ ከአካባቢው አልፎ በሌሎች አካባቢዎችም ተጽዕኖ እንደሚኖረው አመልክተው፤ ሁሉም አገሮች ድምፃቸውን እንዲያሰሙ ጥሪ አቅርበዋል።

ለሰላማዊ መፍትሄው እውን መሆን ከኢትዮጵያ ጋር በቅርበት እንደሚሰሩም አረጋግጠዋል፡፡

ኢትዮጵያ በአፍሪካ ቀንድ ሠላም እና መረጋጋት እንዲኖር ለምታደርገው ጥረት አድናቆታቸውን የገለጹት አሚሩ፤ የሁለትዮሽ ግንኙነቱ የበለጠ እንዲጠናከር ኩዌት ፍላጐት እንዳላት አስረድተዋል።

ዶክተር ወርቅነህ ከኩዌት የውጭ ጉዳይ ሚኒስትር ሼክ አል ካህሊድ አል አህመድ አል ሳባህ ጋር በተመሳሳይ በሁለትዮሽና የባለብዙ ወገን ጉዳዮች ላይ ተነጋግረዋል።

Published in ፖለቲካ

ሰኔ 12/2009 እኤአ በ2017 መጀመሪያ 65.6 ሚሊዮን ሰዎች በጦርነትና መሰል ችግሮች ከአካባቢያቸው መፈናቀላቸውን በተባበሩት መንግሥታት የስደተኞች ኮሚሽን ይፋ አደረገ፡፡

የኮሚሽኑ ሪፖርት እንደሚያስረዳው ከተፈናቃዮች መካከል 22.5 ሚሊዮኑ ስደተኞች ሲሆኑ ከዚህ ውስጥ ደግሞ ከግማሽ በላይ የሚሆኑት  እድሜያቸው ከ18 ዓመት በታች ነው፡፡

በጦርነትና መሰል ጉዳዮች በመላ ዓለም በየደቂቃው 20 ሰዎች ከቀያቸው እንደሚፈናቀሉም በሪፖርቱ ተመልክቷል፡፡

ከዓለማችን ስደተኞች ውስጥ 55 በመቶ ያህሉ የደቡብ ሴዳን (1.4 ሚሊዮን)፣ የአፍጋኒስታንና (2.5 ሚሊዮን)  የሶርያ (5.5 ሚሊዮን) ዜጎች መሆናቸውን ከኮሚሽኑ የተገኘው መረጃ ያመለክታል፡፡

የሶርያና ኢራቅ ቀውስ፣ በኮንጎ ዴሞክራሲያዊት ሪፐብሊክ፣ ናይጄሪያና ደቡብ ሱዳን  የተከሰቱት  ግጭቶች በሚሊዮን የሚቆጠሩ ዜጎችን ማፈናቀላቸውንም ነው ሪፖርቱ ያብራራው፡፡

በዓለም ዓቀፍ ደረጃ  የስደት ቀውሱ እያሻቀበ ከሚገኝባቸው ሀገራት መካከል በግንባር ቀደምነት የተሰለፈችዋ ደቡብ ሱዳን  በአሁኑ ጊዜ ከአንድ ሚሊዮን የሚልቁ ዜጎቿ ወደ ጎረቤት ኡጋንዳ ተሰደውባታል፡፡

ከስደተኞች ቁጥር አንጻር በዚህ ዓመት ሀገሪቱ ለስደተኞች መሰረታዊ ድጋፍ ከሚያስፈልጋት ገንዘብ ውስጥ 17 በመቶ ያህሉን ብቻ ማግኘቷም በሪፖርቱ ተመልክቷል፡፡

በርካታ ስደተኞችን ላስጠለሉ ሀገራት ድጋፍ ማድረግ በሚቻልበት ሁኔታ ለመምከር የዓለም መሪዎች ባለፈው ሳምንት ካምፓላ ውስጥ ተመካክረዋል፡፡

በውይይቱም የኖርዌይ ስደተኞች ምክር ቤትዋና ጸሃፊ ጃን ኤገላንድ“የአሜሪካ፣አውስትራሊያና የአውሮፓ መሪዎች አጥር ቢያቆሙና ልዩ ልዩ መሰናክሎችን ቢያስቀምጡም” የስደት ቀውስ አለመገታቱን ገልጸው  ሀገራቱ ቀውሱን ከእይታቸው ውጪ ቢያደርጉትም  ችግሩ ከዓለም ዓቀፉ ማህበረሰብ ህሊና እንዳልጠፋ ተናግረዋል ፡፡

ዋና ጸሃፊው እንዳብራሩት የበለጸጉና የተረጋጉ የአውሮፓና አሜሪካ ሀገራት ስደተኞች እንዳይደርሱባቸው የቻሉትን ሁሉ ከማድረጋቸው ባሻገር በደሃ ሀገራት ለተጠለሉትም የሚፈለገውን ያህል ድጋፍ ከማድረግ ወደ ኋላ ብለዋል፡፡

እያሻቀበ የመጣው የተፈናቃዮች ቁጥር ፖለቲካዊ እልባት እንዲያገኝ  በቁርጠኝነት መስራት፣ ሰብዓዊ ፍላጎቶችን ለማሟላት የሚደረገውን ድጋፍ ማሳደግና ሁሉም ሀገራት የተጠያቂነት ድርሻቸውን እንዲወስዱ ማነቃቃት እንደሚያስፈልግም ነው የኖርዌይ ስደተኞች ምክር ቤት ዋና ጸሃፊ  ያብሩት፡፡

ዓለም የገጠማትን ፈተና ለመቋቋም ሁሉም ሀገራት የድርሻቸውን እንዲወጡም ጥሪ አቅርበዋል፡፡

ኢትዮጵያ በ26 የስደተኛ መጠለያ ጣቢያዎች ከ850 ሺህ በላይ የተለያዩ  ሀገራት ዜጎችን አስጠልላለች።

ዓለም ዓቀፉ የስደተኞች ቀን "አጋርነት ለስደተኛ ወገኖቻችን" በሚል መሪ ሀሳብ በጋምቤላ ብሔራዊ ክልላዊ መንግሥት ጉኘየል የስደተኞች መጠለያ ጣቢያ በነገው ዕለት ይከበራል፡፡

 

ምንጭ፡- UNHCR፣CGTN Africa፣ኢዜአ

Published in ማህበራዊ

ገዛኸኝ ደገፉ (ኢዜአ)

ዝናቡን ለማሳለፍ  ሁሉም መንገደኛ ወደቀረበው መጠለያ መሯሯጥ ይዟል። እኔም ስታዲየም አካባቢ ባለች አነስተኛ ካፌ ውስጥ ጥግ ይዤ ተቀምጫለሁ፤ ቀጠሮ የሰጠኝን ጓደኛዬን ለመጠበቅና የሚጥለውን  ዝናብ ለማሳለፍ መሆኑ ነው

ተሳክቶልኝ 15 ደቂቃ ያህል ብቀድመውም በቀጠሮ አከባበርና ንባብ ላይ ቀልድ የማያውቀው ጓደኛዬ በሰአቱ ካፌዋ ውስጥ ተገኘ።

በወርሃ ሃምሌ አብዛኞቹ የሃገራችን ዩኒቨርሲቲዎችና ኮሌጆች ለአመታት ያስተማሯቸውን ተማሪዎች ያስመርቃሉ። በመሆኑም ወቅቱ ለተመራቂ የሚበረከቱ ስጦታዎች ከወትሮ ዋጋቸው  ወደድ ማለቱ  የተለመደ ነው።

እኛም ከወር በፊት በተመራቂ ጓደኛችን በተደረገልን ጥሪ መሰረት ወደ ተመራቂው ቤት ከመሄዳችን በፊት ስለምንሰጠው የማስታወሻ ስጦታ መነጋገራችን አልቀረም። ስጦታው መሆን ካለበት ኪሳችንን የማይጎዳ ግን የማይረሳ መሆን እንዳለበት ስንነጋገር አጠገባችን ቆሞ ያላስተዋልነው መጽሃፍ አዟሪ ለስጦታ የሚሆኑ መጽሃፎችን እንደያዘ ቀልጠፍ ብሎ ነገረን።

የግርሃም ሃንኩክ Lords of Poverty /የድህነት ጌቶች/ የጓደኛዬን ቀልብ ሳበው፤ ስለምርጫው ያስቀመጠው ምክንያት ደግሞ ተመራቂው ጓደኛችን ከሌሎቻችን ባነሰ የመመረቂያ ነጥብ የመጀመሪያ ዲግሪውን እንደያዘ ምንም የስራ ልምድ ሳይኖረው ስድስትና ሰባት አመታት የስራ ልምድና ማስትሬት ዲግሪን የሚጠይቅስራ መደብ ላይ ከሚያምር ቢሮና ከምርጥ መኪና ጋር ሊቀመጥ የቻለበት ጉዳይ ሁላችንንም ሲከነክነን እንደነበር በማስታወስ ነው።

“ይሄን መጽሃፍ ካነበብኩት አመት ያህል ሆኖኛል። እናም የትምህርት ማስረጃውን በ ‘C’ ሞልቶ የተመረቀው ጓደኛችን በብርሃን ፍጥነት እዚህ ላይ እንዴት ሊደርስ እንደቻለ ጥሩ ማሳያ ይሆናል ብዬ ስላሰብኩ ነው።

ጓደኛችን አክስቱ አሜሪካ እንደምትኖርና የሆነ ትልቅ የእርዳታ ድርጅት ውስጥ ትልቅ ቦታ እንዳላት ደጋግሞ ሲነግረን እንደነበር ታስታወሳለህ መቼም

ያኔ የምርቃታችን ሰሞን ሴትየዋ ከአሜሪካ ወደ ኢትዮጵያ የመጣችበት ወቅት ነበር። አሁን ያለበት ድርጅት ውስጥ ካለው ሃላፊ ጋር ተጨባብጠው ተሳሳቁ ጓደኛችን ፈተናውን አለፈ ተባለና ስራ መያዙን ሰማን

በመሆኑም መጽሃፉን ብንሰጠውና ቢያነበው አንደኛ ራሱን ይመዝንበታል፤ ሁለተኛ ከሃገራችን አልፎ አህጉራችን አፍሪካንና የተቀረውን አለም ያይበታል ብዬ ስላሰብኩ ነውአለኝ

*****

ስኮትላንዳዊውን ጋዜጠኛ ግርሃም ሀንኩክን ኢትዮጰያውያን አንባቢዎች የሚያውቁት the Sign and the Sealታቦተ ጺዮንን ፍለጋ’ በሚል ባሳተመው መጽሃፍ ሲሆን Ethiopia: The Challenge of Hunger የሚል ሌላ መጽሃፍም አለው

ድህነትን ለመግለጽና ለማስረዳት ታላላቅ የአለማችን የምጣኔ ሃብትና የፖለቲካ ሳይንስ ምሁራን እንዲሁም ድርጅቶች የራሳቸውን ትንታኔዎች የሰጡ ቢሆንም አሁንም ድህነትን ይሄ ነው የሚል አስማሚ ብያኔ ላይ መድረስ እንዳልቻሉ ይነገራል

ሆኖም በግርድፉ ድህነት ሲነሳ ደግሞ ሃብታምና ድሃ፣ ሰጭና ተቀባይ፣ የበላይና የበታች መኖራቸው አይቀሬ ነው

አፍሪካ፣ የላቲንና የኤሺያ ሃገራት ስማቸው ከድህነት ጋር ተደጋግሞ ሲጠራ መስማት የተለመደ መሆኑን ሁላችንም የምናውቅ ሲሆን፤ በእነዚህ አህጉራት ያሉ ድሃ ህዝቦችን ለማገዝ በሚል ብዙ ነገሮች ይሰራሉ

በተጠቀሱት ሃገራትና አህጉራት ለሚገኙ ተረጂዎች ድጋፍ ማሰባሰቢያ በሚልም ታላላቅ የሙዚቃ ዝግጅቶች በአውሮፓና በአሜሪካ ከተሞች መዘጋጀት ከጀመሩ አመታትን አስቆጥረዋል

ለጋሽና የበጎ አድራጎት ድርጅቶች ከለጋሾች በተሰበሰበው ገንዘብ  አከናወን የሚሏቸውን ልዩ ልዩ ስራዎች ሲያስመርቁና ራሳቸውን ሲያስተዋውቁ  ማየትም ብዙም  አዲስ ነገር  አይደለም

ያለመታደል ሆኖ አህጉራችን አፍሪካም ሆነች ሃገራችን ኢትዮጵያ በታሪካቸው የበዙ አሳፋሪና አሰቃቂ የእርስ በእርስ እልቂቶችን፣ ድርቅና የረሃብ አደጋዎችን ደጋግመው ማስተናገዳቸውን ሁላችንም የምናውቀው እውነታ ነው

እነዚህ ክስተቶች እንዳይኖሩ ወይም ጉዳታቸው ይቀንስ ዘንድም አፍሪካውያን የተማጽኖ  እጃቸውን ወደ ምእራባውያን መዘርጋታቸውን አሁንም አላቆሙም

ለትርፍ ያልተቋቋሙ ግብረ-ሰናይ ድርጅቶች በመላው አለምና በአፍሪካ ቁጥራቸውም ሆነ ተግባራቸው እያደገ ስለመምጣቱ ዘገባውን ያስቀመጠው ኒውስ 24 እንደሚያመለክተው ከሆነ በደቡብ አፍሪካ 100 በላይ የተመዘገቡ ድርጅቶች ሲኖሩ፤ በኬንያ ደግሞ  1997-2006 ባሉት አስር አመታት 400 በመቶ ማደጋቸውን አስነብቧል

1980ዎቹ ከፍተኛ እዳ ውስጥ የተዘፈቁ የአፍሪካ ሃገራት ወጪያቸውን እንዲቀንሱና መንግስታቱ የማይሸፍኗቸውን ጉዳዮች መንግስታዊ ያልሆኑ ለጋሽ ድርጅቶች ነጻ ሆነው እንዲሰሩ ለማስቻል የአለም ባንክና የአለም የገንዘብ ድርጅት ባስቀመጡት አስገዳጅ መመሪያ መሰረት ወደ አህጉሪቱ እንደገቡ ያሰፈረው ዘገባው ድርጅቶቹ ለደሃው ማህበረሰብ መሰረታዊ ፍላጎቶች መሟላት የበኩላቸውን አስተዋጽኦ ማበርከታቸውን አመልክቷል

የአስተዳደር ጣልቃ ገብነት

ለጋሽ ድርጅቶች የህብረተሰቡን ወቅታዊ ችግር በመቅረፍ ረገድ ድርሻቸው ትልቅ መሆኑ አከራካሪ  አይደለም። አስቸኳይ የምግብና የህክምና እርዳታ ለማድረግ የሚለገሱ ስጦታዎች ሰብኣዊ ከመሆናቸው አኳያ ችግር እንደሌለባቸው የሚናገሩት ባለሙያዎች የህብረተሰቡን የወደፊት ህይወት ታሳቢ በማድረግ የተረጂ ሃገራቱ መንግስታት በሚያወጧቸው የልማት እቅዶች መሰረት የሚለገሱ ስጦታዎች ትርጉም ያለው ለውጥ ስለማምጣታቸው በየሃገራቱ  የተሰሩ  ታላላቅ የጤናና የትምህርት ተቋማት ምስክር መሆናቸውን ይጠቅሳሉ

ዛምቢያዊት የምጣኔ ሃብት ባለሙያ ዳምቢሳ ማዮ ዴድ ኤይድ /Dead Aid/ የተባለ በእርዳታ ድርጅቶች አጠቃላይ አደረጃጀትና አሰራር ዙሪያ ትኩረት ያደረገ መጽሃፍን ለንባብ አብቅታለች

የለጋሽ ድርጅቶቹ ተጠያቂነት የጎደለውና ገደብ ያልተበጀለት የገንዘበ አጠቃቀም አፍሪካውያን ተረጂዎች ላይ ስለሚያሳድረው ተፅእኖ ባለሙያዋ በመጽሃፉ እንደመከራከሪያ የምታቀርበው ሃሳብ ሲሆን፤ ድርጅቶቹ ለታላላቅ ስራ አስኪያጆቻቸውና ባለሙያዎቻቸው የሚከፍሉት ረብጣ ገንዘብ  የአፍሪካ ሃገራትን የእርዳታ ድርጅቶች መፈንጫ ከማድረጉም በላይ የአፍሪካ የፖለቲካና የህዝብ አስተዳደር ስርአት ለቀውስ እንዲዳረግ አድርጓል ባይ ነች

እንደ ጸሃፊዋ ገለጻ ከሆነ ለጋሽ ድርጅቶቹ በአፍሪካውያን ስም ከምእራባውያን ለምነው የሚያመጡትን ዶላር አስደንጋጭ ደሞዝ ስለሚከፍሉ በመንግስት ቢሮዎች ውስጥ ተቀጥሮ የሚሰራውን የተማረ አፍሪካዊ ቢሮክራት ተስፋ እንዲቆርጥ በማድረግ ወደ ውጭ እንዲያማትር፣ ያሳደገውን ማህበረሰብ ለማገልገል መማለጃ እንዲቀበልና ተገቢ ያለሆነን ብልጽግና እንዲያስብ እያስገደዱት ነው ትላለች

የሃገራቱ ተሞክሮ

ባለፉት ወራት በግብጽ ያለፈቃድ ሲንቀሳቀሱ የነበሩና ራሳቸውን የሰብአዊ መብት ተቆርቋሪ ብለው የሚጠሩ ድርጅቶች እንዲስተካከሉ አልያም ግብጽን ለቀው እንዲወጡ የሚያስችል አሰራር ስለመዘርጋቱ የግብጽ ባለስልጣናትን ጠቅሶ ያተተውአልጀዜራ ቴሌቪዥን ድርጅቶቹ 2011 የተጀመረውን የአረቡ አለም አብዮት እንዲባባስ ከማድረጋቸውም ባሻገር የትኛውም መንግስታዊ መዋቅር አቅም እንዳይኖረው ለማድረግ መንቀሳቀሳቸውን አትቷል

በሆስኒ ሙባረክ አስተዳደር የግብጽ የውጭ ጉዳይ መስሪያ ቤት ከፍተኛ አማካሪ / አብዱላህ አል አሻል እንደተናገሩት፤ ጥቂት የማይባሉ የሰብአዊ መብት አቀንቃኞች ከምእራባውያን ሃገራት ቀጥተኛ ትእዛዝና ድጋፍ ያገኛሉ፣ አጀንዳ ይቀርጻሉ፣ አስፈጻሚዎቻቸውን መልምለው ስምሪት ይሰጣሉ ብለዋል

ለአላማቸው ማስፈጸሚያ የሚሆናቸውን ገንዘብ ያለ ችግር ስለሚያገኙ የሚፈልጉትን ጉዳይ ለማንሳትና ሰልፍ ለመጥራት ችግር የለባቸውም የሚሉት ዶክተሩ የመጨረሻ ግባቸው በስልጣን ላይ ያለው መንግስት መሥራት እንዳይችል የህዝብ ቁጣን በመቀስቀስ ማወክ፤ ከፍ ሲልም እንዲወርድ ለማድረግ ሰፊ ትንታኔና  የሚድያ ሸፋኑን ማመቻቸት ነው ብለዋል

በሌላ በኩል የምርጫና የፖለቲካ ምህዳሩ እንዲጠብና ቭላዲሚር ፑቲን የፈለጉትን እንዲያደርጉ ምቹ መንገድ መፍጠራቸውን በማንሳት ውትወታውን የሚያቀርበው ሂውማን ራይትስ ዎች የተባለው ድርጅት ኦፕን ሩስያ የተባለው ተሟጋች ድርጅት እንዲዘጋ መወሰኑ የሩስያ መንግስት ለአለም የዲሞክራሲያዊ ስርአት ግንባታ ምን ያህል እንቅፋት እየሆነ መሆኑን ለማሳየት ሞክሯል

ጉዳዩን አስመልክቶ ምላሻቸን የሰጡት ፑቲን የሩሲያ ጉዳይ መወሰን ያለበት በሩሲያውያን በመሆኑ ለሩሲያ ህመም መፍትሄ የሚሆነው ሩሲያውያን የሚያመጧቸው መድሃኒቶች እንጂ በምራባውያን ባለመሆኑ እነሱ በሚልኳቸው አካላት ሩሲያ እንድትረበሽ እንዳማይፈቅዱ አፅንኦት ሰጥተው ተናግረዋል

ቻይና ከወትሮው በበለጠ መንግስታዊ ባልሆኑ ድርጅቶች ላይ ቁጥጥሯን አጥብቃለች የሚለው የአሜሪካው ሲኤንኤን ዘገባሰብአዊ መብት ተሟጋቾች ስራቸውን እንዳይሰሩ ህጉ አላንቀሳቅስ ስለማለቱ አስነብቧል። ጉዳዩ  ቻይና ለሰብአዊ መብቶች መከበር ስላለት ግዴለሽነት አመላካች ሲልም ማብራሪያውን ሰጥቷል

ቻይና በሳይንስና በቴክኖሎጂ፣ በአካባቢ ጥበቃና በመሳሰሉት ጉዳዮች ላይ የሚሰሩ ድርጅቶችን አሁንም እንደምትፈልግ የተናገሩት የቻይና ሠራተኞች ቡለቲን ሊቀመንበ ሃን ዶንግፋንግ አዲስ የወጣው ህግ ቻይና ልዩ ልዩ  ህግጋትና ደንቦችን አክብረው ለሚሰሩት ይህን ያህል ከባድ እንደማይሆንባቸው አስረድተዋል

ኢትዮጵያ በደቡብ ብሄሮች ብሄረሰቦችና ህዝቦች ክልል የኦሞ ወንዝን ተከተሎ እየተገበረችው ባለው የመስኖ ልማትና የኃይል ማመንጫ ግድብ ግንባታ ሳቢያ ሂውማን ራይትስ ዎችና ራሱን የወንዞችና የአካባቢ ተሟጋች ያደረገው ኢንተርናሽናል ሪቨርስ የተባለው ድርጅት ሰፊ ዘመቻ ከፍተው ሲንቀሳቀሱ የነበረ ሲሆን፤ የዘመቻው ማጠንጠኛም ወንዙ የአጎራባች ኬንያን የቱርካና ሃይቅ መጠን በመቀነስ ሃይቁን ጨዋማ ያደረገዋል የሚል ነበር። በአካባቢው ያሉ የሃመር፣ የበና እና የሙርሲ ብሄረሰቦችን የቀደመ የአኗኗር ዘይቤም እንዲረበሽ ያደረገዋል ሲሉ እንደነበር አይዘነጋም

የኢትዮጵያ ምርጫና የዴሞክራሲያዊ ስርአት ግንባታ ሂደት ሲነሳ የ1997 ምርጫ ወርቃማው ጊዜ መሆኑን የሚጠቅሱት የፖለቲካ ሳይንስ ተንታኞች ሂደቱ እስከ ድምጽ መስጫው እለት ድረስ ነጻና ሰላማዊ የነበረ መሆኑን አስታውሰው፤ የምርጫ ውጤት ለህዝብ ሲገለጽ ሃገሪቱ ወደ አልፈለገችው አቅጣጫ እንድትሄድ የሚያደርጉ ሁነቶች የተፈጠሩት ራሳቸውን የመብት ተሟጋች ባደረጉ ቡድኖችና ድርጅቶች ገደብ የለሽ ጣልቃ ገብነት ምክንያት መሆኑን ይናገራሉ።

ህጉ ለምን አስፈለገ?

የኢትዮጰያ ፌዴራላዊ ዴሞክራሲያዊ ሪፐብሊክ ህገመንግስት አንቀጽ 31 “ማንኛውም ሰው ለማንኛውም አላማ በማህበር የመደራጀት መብት አለው፤ ሆኖም አግባብ ያለውን ህግ  በመጣስ  ወይም ህገመንግስታዊ ስርአቱን  በህገ ወጥ መንገድ  ለማፍረስ  የተመሰረቱ  ወይም የተጠቀሱትን  ተግባራት  የሚያራምዱ  ድርጅቶች  የተከለከሉ ይሆናሉ”   ይላል።

በመሆኑም የአዋጅ ቁጥር 621/2001 ተብሎ የተሰየመው የበጎ አድራጎት ድርጅቶችንና ማህበራትን ለመመዝገብና ለማስተዳደር የወጣው ህግም ከሌሎቹ ሃገራት ጋር ሲነጻጸር የተሻለ ነጻነት ስለመስጠቱ ማስረጃዎችን በማስቀመጥ የሚከራከሩ አካላት ቢኖሩም፤ ህጉ አፋኝና ምንም አይነት ነጻነት የማይሰጥ፤ የድርጅቶቹንና የማህበራቱን ህልውና አደጋ ላይ የሚጥል ስለመሆኑ የሰብዓዊ መብት ተሟጋች ነን በሚሉ አካላት ተደጋግሞ ሲገለጽ ይሰማል።

አዋጁን የሚነቅፉት አካላት እንደሚሉት ከገንዘብ ምንጭና የአስተዳደር ጉዳዮች አንጻር ያሉት ጉዳዮች ስራ ለመስራት አስቸጋሪ እንደሆኑባቸውና መንቀሳቀሻ ገንዘብ ከሃገር ውስጥ ለማሰባሰብ ደግሞ ኢትዮጵያውያን ለድርጅቶች ድጋፍ የማድረግ ባህላቸው እንደ ምእራባወያኑ ስላልሆነ በገንዘብ እጥረት እየተቸገሩ ስለመሆኑ ያነሳሉ

መንግስት በበኩሉ ህጉ የወጣው ድርጅቶቹ ከውጭ የሚያመጡትን ገንዘብ ለታለመለት አላማ ብቻ እንዲያውሉት ለማስቻልና በሃገሪቱ የሚንቀሳቀሱ ድርጅቶች ሁሉ የሃገሪቱን ህጎችና ደንቦች አክብረው እንዲንቀሳቀሱ ለማድረግ በመሆኑ የሀገሪቱ ፖለቲካዊና አስተዳደራዊ ጉዳዮችን የሚመለከቱ ኢትዮጵያውያንን እና የኢትዮጵያ መንግስትን ብቻ በመሆኑ የውጭ አካላት ተሳትፎ አስፈላጊ አለመሆኑን ደጋግሞ ይናገራል

የእርዳታ ድርጅቶቹ በሚንቀሳቀሱባቸው አንዳንድ የኢትዮጵያ አካባቢዎች የሚኖሩ  የህብረተሰብ ክፍሎችም ሁሉንም አይነት ድጋፎች ከድርጅቶቹ ስለሚጠብቁ ሰርቶ የመለወጥና ራስን የመቻል አስተሳሰብን በህብረተሰቡ ላይ የማስረጽ ሂደቱን ፈታኝ አድርጎት እንደነበር ጥናቶች ያሰረዳሉ። 

ወደ መጽሀፉ

የግርሃም ሃንኩክ የድህነት ጌቶች /Lords of Poverty/ ተብሎ የተሰየመው መጽሃፍ እንደሚያትተው ታላላቆቹ የእርዳታና የግብረ ሰናይ ተቋማት ሃላፊዎችና ባለሙያዎች ለስራ ማስኬጃ፣ ለመስተንግዶ፣ ለስብሰባ፣ ለአውሮፕላን ጉዞ፣ ለሆቴል ቆይታ፣ ለስልጠናና ለደሞዝ የሚመድቡት በጀት የአሜሪካ ግዙፍ ኩባንያዎች እንኳን ሊከፍሉት የማይችሉት መሆኑን አውስቷል

ለንጽጽር እንዲሆን አንድ አሜሪካዊ የመካከለኛ መደብ ሰራተኛ የጤና ሽፋን ለማግኘት በአማካይ አስራ ሶስት አመታት ያህል ማገልገል ያለበት ሲሆን፤  በተባበሩት መንግስታትና በሌሎች ተቋማት የተቀጠረ እድለኛ ሰራተኛ ግን የጤና ሽፋኑን ለማግኘት መጠበቅ ያለበት አንድ ወር ብቻ ነው

በመሆኑም በድሃ ሃገራት የተንሰራፋው ድህነት ለተቋማቱ ሰራተኞችና ሃላፊዎች ህይወት በፍስሃና በሽርሽር የተሞላች እንድትሆን ማስቻሉን የሚሞግቱ አካላት እንደሚሉት ከሆነ በየትኛውም የአለም ጥግ ድህነት በእርዳታ ስላለመጥፋቱ  ግርሃም ሃንኩክን አስረጂ አድርገው ያነሳሉ ።

በድሃ ሃገራት ያሉት አብዛኞቹ ግብረሰናይ ድርጅቶች ውስጣዊ የአስተዳደር ዘይቤ በራሱ ጥያቄ እንደሚያስነሳ የሚያወሱ ወገኖች እንደሚያስቀምጡት ከሆነ ድርጅቶቹ የቢሮ መዋቅር  በቤተሰብና በወዳጅ ዘመድ ስለመተብተቡና ትምህርትና የስራ ልምድን መሰረት አድርገው ቅጥርና ስንብት እንደማያደርጉ በርካታ አስረጂዎችን ይጠቅሳሉ

እንደዚህ አይነቶቹ አካሄዶች ታላላቆቹ ግብረሰናይ ድርጅቶች የራሳቸውን ተልእኮ የሚያስፈጽሙላቸውን ሌሎች አነስተኛ ተቋማት በልዩ ልዩ ስያሜዎች በድሃ ሃገራት እንዳስፋፉ  ያተተው የግርሃም ሃንኩክ መጽሃፍ ምእራባውያን ግብር ከፋዮችና በደሃ ሃገራት መንግስታት እየተሰራ ያለውን ነገር እንዲያጤኑት መነሻ  እንደሆነ ሃሳባቸውን የሚያነሱ  አካላት አሉ

ከላይ ለማሳያነት ያቀረብኩት የትምህርት ቤት ጓደኛዬ በአቋራጭ የድህነት ኑሮን ጤና ይስጥልኝ ብሎ ተሰናብቶ እሱም ከራሱ አልፎ ሌሎች ዘመዶቹን በተመሳሳይ መንገድ ጠቅሞ በግብረ ሰናይ ስም ግብረ ገብነት የጎደለው ተግባር በመፈፀም ኑሮውን እየገፋ ይገኛል። መሰል በርካታ የድህነት ባለፀጎችን በያሉበት ቤቱ ይቁጠራቸው።

Published in ዜና-ትንታኔ

መቀሌ ሰኔ 12/2009 በሀገሪቱ የዴሞክራሲዊ ስርዓትን ለማጎልበት  የሲቪክ ማህበራትና የህብረተሰቡ  ተሳትፎ  ሊጠናከር  እንደሚገባ በመቀሌ፣ በአዲግራትና በአክሱም ዩኒቨርስቲዎች አስተያየታቸውን የሰጡ ምሁራን አመለከቱ፡፡

 ከምሁራኑ መካከል በመቀሌ ዩኒቨርስቲ የስነዜጋና ስነምግባር መምህር ሸዊት ገብረእግዚአብሄር ለኢዜአ እንዳሉት በአንድ አገር የዴሞክራሲ ስርዓት ሂደት መንግስት ለዘርፉ የሰጠውን ትኩረት ያሳያል።

 ይሄውም የዜጎች ሰብአዊና ዴሞክራሲያዊ መብቶች እንዲከበሩ በህገመንግስቱና ከዚህ በመነጩ የህግ ማዕቀፎች መረጋገጡ በሀገሪቱ  የዴሞክራሲ ስርዓት ግንባታ እውን እንዲሆን ያለውን ፍላጎትና ቁርጠኝነት እንደሚያመለክት ተናግረዋል፡፡

 እነዚህን ምቹ ሁኔታዎች በመጠቀም ሲቪክ ማህበራትና ህብረተሰቡ  የነቃ ተሳትፎ ማድረግ ለዴሞክራሲ ስርዓት ግንባታ  መፋጣን ወሳኝነት አለው፡፡ 

 " ዴሞክራሲያዊ መንግስት የምንፈልግ ከሆነ እንዲኖርም እንዳይኖርም የምናደርገው ራሳችን በምናደርገው ተሳትፎ ይወሰናል፤  ዜጎች  በተለያየ እርከን ከታች ከወረዳው ጀምሮ እስከ ላይ ባሉት የመንግስት መዋቅሮች ላይ በንቃት መሳተፍ ይኖርባቸዋል" ብለዋል መምህር ሸዊት።

 ከዴሞክራሲ ስርዓት ግንባታ መገለጫዎች መካከል የዜጎች እኩልነት፣ በነፃ የመደራጀትና ከቦታ ወደ ቦታ የመንቀሳቀስ መብቶች መከበር እንደሚገኙበት የተናገሩት ደግሞ በመቀሌ ዩኒቨርስቲ የስነ ምግባርና ስነ ዜጋ መምህርት ሶስና አዳነ ናቸው፡፡

 ዜጎችና የኃይማኖት  እኩልነት  መኖር  ተከባበረው  ለሀገራዊ እድገት በጋራ እንዲነሳሱ ያደርጋል፡፡

 መምህርት ሶስና እንዳሉት በከፍተኛ የትምህርት ተቋማት  ተማሪዎችና ሌላው ማህበረሰብ  በጋራና በእኩልነት አብሮ መንቀሳቀስ  ጎልቶ የሚታይባቸው ናቸው፤ በእነዚህም ዴሞክራሲ ስርዓት  ለማዳበር የሚያስችሉ ስራዎች በቀጣይነት መስራት አለበት፡፡

 በዓዲግራት ዩንቨርስቲ የስነዜጋና ስነምግባር መምህር ወልደአብርሃ ንጉስ በበኩላቸው "የሲቪክ ማህበራትና በየደረጃው የሚገኙ የምክር ቤት  አባላት ለዴሞክራሲ  ስርዓት ግንባታ የበኩላቸውን  ሚና እንዲወጡ ማድረግ ያስፈልጋል" ብለዋል።

 መንግስት ባለፉት 26 ዓመታት ለዴሞክራሲ ስርዓት ግንባታ ምቹ ሁኔታዎች ያስቀመጠ ቢሆንም የዴሞክራሲ ተቋማትን ለማጠናከር የተከናወኑ ስራዎች ግን የተፈለገውን ያህል አለመሆኑን ገልጸዋል።

 "  በዴሞክራሲ የምናገኘው ውጤት ልክ የዘራነውን  እንደምናጭድ ያህል የሚቆጠር ነው " ያሉት መምህሩ  በተለያዩ አካባቢዎች አልፎ አልፎ እየታዩ ያሉት የመልካም አስተዳደርና የሰብአዊ መብት ጥሰቶች በቀላሉ ሊታዩ እንደማገባም ጠቅሰዋል፡፡

 በአክሱም ዩንቨርስቲ የፖለቲካል ሳይንስ መምህር ዶክተር ነጋ ሰለሞን እንዳሉት ደግሞ  የሃሳብ ልዩነት የሚስተናገድበት ብዙሃነትን ማጠናከር ለዴሞክራሲ ስርዓት ግንባታ አስፈላጊ ነው።

 ዩኒቨርስቲዎች የብሔሮች ብሔረሰቦችና ህዝቦች  መገለጫ በመሆናቸው ለዴሞክራሲ መጎልበት የበኩላቸው ሚና እየተጫወቱ  መሆናቸውን ጠቅሰው በዚህ ላይ  የህብረተሰቡም ድርሻና ተሳትፎ  ሊጠናከር እንደሚገባም ጠቁመዋል።

Published in ፖለቲካ

አዲስ አበባ ሰኔ 12/2009 በአነስተኛና መካከለኛ ደረጃ የሚገኙ የግንባታ ባለሙያዎችን ወደ ከፍተኛ ደረጃ ለማሸጋገር የአቅም ግንባታ ስራ እያከናወነ መሆኑን የኮንስትራክሽን ሚኒስቴር አስታወቀ።

 ሚኒስቴር መስሪያ ቤቱ ከመቀሌ፣ ሐዋሳ፣ ባህርዳር፣ አዲስ አበባ እና ድሬዳዋ ከተሞች በግንባታ ዘርፍ ለተሰማሩ ባለሙያዎች ለአምስት ቀናት የሚቆይ ስልጠና በመስጠት ላይ ነው።

 በሚኒስቴሩ የባለሙያዎችና ኩባንያዎች አቅም ግንባታ ቢሮ ኃላፊ አቶ ኢያሱ ማርቆስ እንደተናገሩት በተደረገ የዳሰሳ ጥናት በዘርፉ የተሰማሩ ባለሙያዎች በስራ ዕድል ፈጠራ፣ በሀብት አጠቃቀምና፣ በድርጅት አስተዳደር ከፍተኛ ችግሮች ይታይባቸዋል።

 በጥናቱ ግኝት መሰረትም ባለሙያዎቹ ያለባቸውን የዕውቀት ክፍተት በመለየት ስልጠና እየተሰጠ ይገኛል ብለዋል።

 የኮንስትራክሽን ኢንዱስትሪውን በዓለም አቀፍ ደረጃ ተወዳዳሪ ለማድረግ ብቃት ያለው የሰው ኃይል ማጎልበት ወሳኝ በመሆኑ መንግስት የ10 ዓመት የአቅም ግንባታ ማዕቀፍ ፕሮግራም ቀርጾ በመስራት ላይ ነው ብለዋል አቶ ኢያሱ።

 ባለፉት ዓመታት በአነስተኛና መካከለኛ ደረጃ የሚገኙ ባለሙያዎችን ብቃትና ክህሎት ለማጎልበት በተሰሩ ስራዎች ዓለም አቀፍ ተወዳዳሪ የሆኑ ባለሙያዎችን ማፍራት ተችሏል ነው ያሉት።

 ለባለሙያዎች የተሰጡ ተከታታይ የአቅም ግንባታ ስልጠናዎች፣ ከፋይናንስ ተቋማት ብድር እንዲያገኙ በማመቻቸት፣ ከዓለም አቀፍ መድረኮች የተሻሉ ተሞክሮዎችን እንዲያገኙ መደረጉንም ጠቅሰዋል።

 በአሁኑ ወቅት ከ40 በላይ የጥራት ስራ አመራር ደረጃ ያገኙ ባለሙያዎች አሉ ያሉት አቶ ኢያሱ የባለሙያዎቹ ቁጥር ከአገሪቱ የግንባታ ኢንዱስትሪ እድገት ጋር ተመጣጣኝ ባለመሆኑ ቁጥሩን ለማሳደግ ድጋፉ ተጠናክሮ ይቀጥላል ብለዋል።

 በቀጣይም አዳዲስ ቴክኖሎጂዎችን የማስፋፋት፣ አሰራሮችን የማሻሻልና የማዘመን የአቅም ግንባታ ስልጠናዎችን ተደራሽ የማድረግ ስራዎች ተጠናክረው እንደሚቀጥሉ ተናግረዋል።

 

Published in ኢኮኖሚ
Monday, 19 June 2017 21:35

የራስ ዳራ

Published in ቪዲዮ

አዲስ አበባ ሰኔ 12/2009 ኢትዮጵያ ዓለም አቀፍ መስማት የተሳናቸው ስፖርቶች ፌደሬሽን ሙሉ አባል ለመሆን ያቀረበችው ጥያቄ ከአንድ ወር በኋላ በቱርክ በሚካሂደው ጉባኤ መልስ እንደሚያገኝ ይጠበቃል።

በ23ኛው ዓለም አቀፍ መስማት የተሳናቸው ሻምፒዮና ላይ ኢትዮጵያ ተካፋይ እንድትሆን ጥሪ እንደቀረበላትም የኢትዮጵያ መስማት የተሳናቸው ስፖርቶች ፌደሬሽን አስታውቋል።

መስማት የተሳናቸው ስፖርት ውድድሮች በፓራ ኦሊምፒክ ስፖርት ሥር ሆነው ነበር ውድድሮችን ሲያካሂዱ የነበሩት።

የዓለም አቀፉ መስማት የተሳናቸው ስፖርት ፌደሬሽን መቋቋምን ተከትሎ ግን መስማት የተሳናቸው ስፖርቶች ከፓራ ኦሊምፒክ እንዲወጣ ተደርጓል።

የኢትዮጵያ መስማት የተሳናቸው ስፖርቶች ፌደሬሽንም በቀድሞ ስፖርት ኮሚሽን በአሁኑ ወጣቶችና ስፖርት ሚኒስቴር ዕውቅና አግኝቶ በ2006 ዓም በፌደሬሽን መልክ ሊቋቋም ችሏል።

ፌደሬሽኑ ከ2007 ዓ ም ጀምሮ በአገር ውስጥ የተለያዩ ውድድሮችን በማድረግ ዓለም አቀፍ መስማት የተሳናቸው ስፖርቶች ፌደሬሽን በጊዚያዊነት አባል መሆን ችሏል።

የኢትዮጵያ መስማት የተሳናቸው ስፖርቶች ፌደሬሽን የጽህፈት ቤት ኃላፊ አቶ ዳኜ መቆያ ለኢዜአ እንደገለጹት ኢትዮጵያ ዓለም አቀፍ መስማት የተሳናቸው ስፖርቶች ፌደሬሽን ጊዚያዊ አባል ሆና ቆይታለች።

የሙሉ አባልነት ጥያቄዋ ደግሞ ከሐምሌ 9 እስከ 11 ቀን 2009 ዓም በቱርክ በሚደረገው ዓለም አቀፍ ጠቅላላ ጉባኤ ይወሰናል ብለዋል።

ኢትዮጵያ በአገር ውስጥ መስማት የተሳናቸው ስፖርተኞች ብቻ የሚሳተፉበት ውድድር ማድረጓ፣ የአፍሪካ መስማት የተሳናቸው ኮንፌደሬሽን አባልና በኮንፌደሬሽኑ ለቦርድ አባልነት መመረጧ ሙሉ አባል እንድትሆን ያግዛታል ብለዋል።

ኢትዮጵያ ዓለም አቀፍ መስማት የተሳናቸው ፌደሬሽን አባል ከሆነች በዓለም አቀፍ ውድድሮች ትሳተፋለች፣ የቁሳቁስና የሙያ ድጋፍም ታገኛለች።

ከጠቅላላ ጉባኤው በተጨማሪ 23ኛው ዓለም አቀፍ መስማት የተሳናቸው ሻምፒዮና ከሐምሌ 11 እስከ 23 ቀን 2009 ዓም በቱርክ ይካሄዳል።

በዚህ ውድድር ኢትዮጵያ ተካፋይ እንድትሆን ከዓለም አቀፍ መስማት የተሳናቸው ስፖርቶች ፌደሬሽን ጥሪ ቀርቦላታል።

በውድድሩ ለመካፈልም በአትሌቲክስ ስፖርት የተሻለ ሰዓት ያላቸው ስድስት መስማት የተሳናቸው አትሌቶች ተመርጠው በግላቸው ልምምድ እየሰሩ ነው ብለዋል ኃላፊው።

ከስድስቱ አትሌቶች መካከል ሁለቱ ሴቶች ናቸው።

Published in ስፖርት

አዲስ አበባ ሰኔ 12/2009 በጦርነት ለተፈናቀሉ የደቡብ ሱዳን ዜጎችና ለጋምቤላ ክልል ነዋሪዎች ነፃ የህክምና አገልግሎት እየሰጠ መሆኑን ድንበር የለሽ የሀኪሞች ቡድን ገለጸ።

ነገ በጋምቤላ የሚከበረውን የዓለም ስደተኞች ቀን አስመልከቶ ለኢዜአ በላከው መግለጫ እንዳስታወቀው ላለፉት ሁለት ዓመታት በጋምቤላ ክልል ተጠልለው ለሚገኙ ስደተኞችና ለክልሉ ህዝብ ነፃ የህክምና እርዳታ በመስጠት ላይ ይገኛል፡፡

ድርጅቱ ባለፈው ዓመት ብቻ በጋምቤላ ክልል ኩሌ፣ ፑኒዶ እና ቲርኪዲ የስደተኞች ጣቢያ ባቋቋማቸው የጤና ኬላዎችና ጤና ጣቢያዎች አማካኝነት ከ260 ሺህ በላይ ለሚሆኑ ስደተኞችና የአካባቢው ነዋሪ የህክምና አገልግሎት መስጠቱን አስታውሷል፡፡

በምስራቅ አፍሪካ የተንሰራፋውን ግጭትና ረሃብ የሸሹ ከ838 ሺህ በላይ ስደተኞች በኢትዮጵያ ተጠልለው ይኖራሉ ያለው የድርጀቱ መግለጫ  በእርስ በርስ ጦርነት እየታመሰች ካለችው ደቡብ ሱዳን ለሚሰደዱና ለአገሪቱ ዜጎች ትኩረት መስጠቱን አስታውቋል፡፡

ድርጅቱ ከኢትዮጵያ መንግስት ጋር በመተባበር ደቡብ ሱዳናዊያኑ ስደተኞች በሚገኙባቸው መጠለያ ጣቢያዎችና በጋምቤላ ከተማ ሪፈራል ሆስፒታል ነፃ የህክምና ድጋፍ እየሰጠ መሆኑንም ጠቁሟል።

በስደተኛ ጣቢያዎቹ የሚንቀሳቀሱት የህክምና ቡድኑ አባላት ባለፉት አምስት ወራት ከ600 በላይ ለሚሆኑ ደቡብ ሱዳናዊያን ስደተኞች እና የአካባቢው ነዋሪ እናቶች የማዋለድ አገልግሎት በነፃ መስጠቱንም አመልክቷል።

ቡድኑ ስደተኞቹ በተጠለሉባቸው ጣቢያዎች በተቋቋሙ የጤና ተቋማት እና በጋምቤላ ክልል ከተማ በሚገኘው ሪፈራል ሆስፒታል ውስጥ የህክምና ድጋፍ ይሰጣል፡፡

ወባ ፣ ስር የሰደደ የተመጣጠነ ምግብ እጥረትና የመተንፈሻ አካላት ኢንፌክሽን በጣቢያዎቹ በሚገኙት ደቡብ ሱዳናዊያን ዘንድ የሚታዩ ዋና ዋና የጤና ችግሮች ናቸው፡፡

በአሁኑ ወቅት የደቡብ ሱዳን ሁኔታ ተስፋ አስቆራጭ እየሆነ ከመምጣቱ ጋር ተያይዞ የጋምቤላ ክልል አሁንም ጦርነቱን የሚሸሹ የደቡብ ሱዳናዊያን መዳረሻ ሆና ቀጥላለች፡፡

Published in ማህበራዊ
Page 1 of 2

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

የውጭ ምንዛሪ መቀየሪያ