አርዕስተ ዜና
Items filtered by date: Saturday, 12 August 2017

ነሐሴ 6/2009 በአፍሪካ ህብረት የሶማሊያ ሰላም ማስከበር ተልዕኮ (አሚሶም) የሶማሊያን ደህንነት ለማረጋገጥ በሀገሪቱ ደቡባዊ ክፍል አንድ ሺህ አዲስ ምልምል ፖሊሶችን ሊያሰለጥን መሆኑን አስታወቀ፡፡

አሚሶም ያወጣውን መግለጫ ዋቢ አድርጎ የቻይናው ዓለም ዓቀፍ ቴሌቪዝን ኔትወርክ  በድረገጹ እንዳስነበበው ከሰልጣኞች መካከል 600ዎቹ ከበለደ ወይኒ ቀሪዎቹ ደግሞ ጆሃር ከተባለው አካባቢ የሚመለመሉ ናቸው፡፡

የአሚሶም ፖሊስ  ተሃድሶ መልሶ ማዋቀር እና ልማት አስተባባሪው ቺኩንጉሩ ማክስዌል እንዳረጋገጡት የሀገሪቱን የጸጥታ አካላት ራዕይ ለማሳካት ይቻል ዘንድ አሚሶም የፖሊስ ማዕከላትን ከማቋቋም ጀምሮ አስፈላጊውን ትጥቅ ለማሟላት  የሚያደርገውን ጥረት አጠናክሮ ይቀጥላል፡፡

ምልምል ሰልጣኞቹ የሀገሪቱን ዜጎች ደህንነትና ጸጥታ መጠበቅ ይችሉ ዘንድ  የአካባቢውን ተጨባጭ ሁኔታ መሰረት ያደረገ ተግባራዊ ስልጠና እንሚሰጣቸውም ነው የተገለጸው፡፡

የሂርሸበሌ ግዛት ምክትል ፖሊስ ኮሚሽነር ጄነራል ሞሃመዲ አብዲ ባሺር  ምንም እንኳን የፖሊስ ኃይሉ እንደልብ ሊያንቀሳቅስ የሚያስችል ትጥቅ ባይኖረውም የዜጎችን ሰላምና ደህንነት ለማረጋገጥ በቁርጠኝነት እየሰራ መሆኑን ተናግረዋል፡፡

Published in ማህበራዊ

አዲስ አበባ ነሀሴ 6/2009  በአዲስ አበባ የቀጨኔ ታዳጊ ሴቶች ማቆያና ማቋቋሚያ ማዕከል ውሰጥ የትምህርት መሳሪያዎች፣ የአልባሳትና የህክምና አቅርቦት ችግር መኖሩን የማዕከሉ ታዳጊ ሴቶች ተናገሩ።

 በማዕከሉ ተገቢ እንክብካቤ እየተደረገላቸው እንዳልሆነም ታዳጊዎቹ አስታወቀዋል።

 በአዲስ አበባ ከተማ አስተዳደር ሴቶችና ህፃናት ጉዳይ ቢሮ ስር የሚገኘው ማዕከል ቤተሰብ የሌላቸው፣ በጎዳና ወድቀው ለአደጋ ተጋላጭና ከሌሎች ህፃናት ማሳደጊያ ተቋማት ለተዘዋወሩ እድሜያቸው ከ8 እስከ 18 ለሆኑ ሴቶች የመጠለያ፣ የምግብ፣ የትምህርት፣ የጤናና መሰል  አገልግሎቶችን ለመስጠት የተቋቋመ ነው።

 ማዕከሉ የሚሰጣቸው አገልግሎቶች ደረጃ የወጣላቸው ቢሆንም፤ በተቀመጠው መስፈርት እየተተገበሩ አለመሆኑን ታዳጊ ሕጻናቱ ይናራሉ።

 በተጨማሪም የሚደረግላቸው እንክብካቤ ቀድሞ ከነበረው ያነሰ መሆኑን ነው ታዳጊ ህፃናቱ ለኢዜአ የገለፁት።

 መስፈርቱን መሰረት በማድረግ በዓመት ሁለት ጊዜ ልብስ እንደማይገዛላቸውና ቢገዛም ዘግይቶ እንደሚደርሳቸው በማዕከሉ ያገኘናቸው ታዳጊ ትዕግስት ሽባባው፣ አይናለም ዘለቀና መቅደስ ወንደሙ  ተናግረዋል።

 ታዳጊ ሴቶቹ ትምህርታቸውን የሚከታተሉት በአካባቢው ባሉ የመንግስት ትምህርት ቤቶች ቢሆንም ቶሎ እንደማይመዘገቡና የትምህርት ቁሳቁስም በአግባቡ እንደማያገኙ ጠቁመዋል።

 በተቋሙ የሚገኘው የህክምና ማዕከል የመጀመሪያ እርዳታ የሚሰጡ ሶስት ነርሶች ቢኖሩትም ተገቢውን ክትትልና የህክምና ድጋፍ እንደማያደርጉ ከታዳጊዎቹ ንግግር ለመረዳት ችለናል።

 ታዳጊዎቹ ተቋሙን ሲለቁ ለመቋቋሚያ የሚሰጣቸው 10 ሺህ ብር በቂ ባለመሆኑ ተመልሰው ወደ ጎዳና በመውጣት ላልተፈለገ እርግዝና እንደሚዳረጉ በተቋሙ ለስድስት ዓመታት ቆይታ የነበራት ወጣት ሃይማኖት ደበበ ገልፃለች።

 መቋቋሚያ ተብሎ የሚሰጠው ገንዘብ "ከቤት ኪራይ ባለፈ ለስራ ፈጠራ የሚውል አይደለም" ብላለች።

 ለመቋቋሚያ ከሚሰጠው የሙያ ስልጠና ጎን ለጎን ድጋፍና ክትትል እንዲሁም ስራው እንዴት እንደሚሰራ የሚሰጥ ግንዛቤ  እንደሌለ ወጣቷ ተናግራለች።    

 የጉለሌ ክፍለ ከተማ ምክር ቤት  የማህበራዊ ዘርፍ ኮሚቴ ሰብሳቢ ወይዘሮ እመይቱ ፀጋዬ  እንደሚሉት፤ ማዕከሉ የተሟላና ብቁ ሰራተኛ እንደሌለው፣ ነርሶች ቢኖሩም አገልግሎት በአግባቡ እንደማይሰጡ፣ ሴቶቹ በአንድ ክፍል ውስጥ ለመኖር ከተፈቀደው ቁጥር በላይ መሆናቸው፣ የተመጣጠነ ምግብ በአግባቡ እንደማያገኙ ተመልክተዋል።

 የተቋሙ ስራ አስኪያጅ አቶ ወላይ ፍስሃ በበኩላቸው እንደሚናገሩት 70 ሚሊዮን ብር አመታዊ በቂ በጀት የተመደበለት ሲሆን፤ የተባሉት ችግሮች አለመኖራቸውንና አገልግሎቱንም በተቀመጠው ደረጃ መሰረት እየሰጡ ናቸው።

 የአዲስ አበባ ሴቶችና ህፃናት ጉዳይ ቢሮ ኃላፊ ወይዘሮ አለምፀሐይ ኤልያስ በበኩላቸው፤ በማዕከሉ የተጠቀሱት ክፍተቶች መኖራቸውን ይገልጻሉ ።

 አገልግሎቱን በተቀመጠው መስፈርት ለመስጠት እየተሰራ መሆኑን አመልክተው፤ የተጠቀሱት ችግሮች የተፈጠሩት አቅራቢዎች ግዴታቸውን በወቅቱ ባለመወጣታቸውና ባለው የሰው ኃይል እጥረት እንደሆነም ገልጸዋል።

 የሚቀርቡት አልባሳትና የንፅህና መጠበቂያዎች ታዳጊዎቹ የሚፈልጉት አይነት እንዲሆኑ ተወካዮቻቸው ባሉበት እንደሚገዛ ኃላፊዋ ጠቁመዋል።

 ኃላፊዋ እንዳሉት ችግሩን ለማቃለል የሚያስፈልጉ ቁሳቁሶችን በመጋዘን የማከማቸት ስራ ተጀምሯል።

 በአጠቃላይ የመዋቅርና የአገልግሎት አሰጣጥ ስርዓቱን ለማስተካከል አዲስ ቢፒአር ተጠንቶ ተግባራዊ ሊደረግ መሆኑን ጠቁመዋል።

 የቀጨኔ ህጻናት ማቆያና ማቋቋሚያ ተቋም በ1944 ዓ.ም በእቴጌ መነን አማካኝነት ተቋቁማል።

Published in ማህበራዊ

አዲስ አበባ 6/2009  ባለፈው በጀት ዓመት ከአንድ ሺህ ሜጋ ዋት በላይ ኃይል የሚያመነጩ ፕሮጀክቶችን ግንባታ ለማካሄድ ቢታቀድም በፋይናንስ እጥረት ምክንያት ስራው አለመጀመሩ ተገለጸ።

የውኃ፣ መስኖና ኤሌክትሪክ ሚኒስቴር ለኢዜአ እንደገለጸው ፕሮጀክቶቹ ከውኃ ፣ ከፀሃይ ፣ ከንፋስና ከእንፋሎት ኃይል ለማመንጨት ታስቦ  በባለፈው ዓመት መጨረሻ እና በተያዘው ዓመት መጀመሪያ ላይ ግንባታቸውን ለማከናወን ታቅዶ ነበር።

ሆኖም የፋይናንስ እጥረትና ዓለም አቀፍ ተቋራጮችን ለማወዳደር የጨረታ ሂደቱ ረጅም ጊዜ በመውሰዱ  በታቀደው መሰረት  ሊጀመሩ አልቻሉም።።

የሚኒስቴሩ የህዝብ ግንኙነት ዳይሬክተር አቶ ብዙነህ ቶልቻ እንደገለጹት የፕሮጀክቶቹ ግንባታ በኦሮሚያ፣በአማራ፣በደቡብ፣ በትግራይና ኢትዮጵያ ሶማሌ ክልሎች ለማካሔድ ታቅዶ ነበር።

በነዚሁ ክልሎች አራት  የከርሰ ምድር ወይም እንፋሎት፣አራት የንፋስ እና ሦስት የፀሃይ ኃይል ማመንጫዎች ሥራ ለማስጀመር ነበር የታቀደው።

ዘንድሮም ቢሆን በፋይናንስ እጥረት ምክንያት ሁሉንም የታቀዱት ፕሮጀክቶችን ማስጀመር አይቻልም ።

በ2010 በጀት ዓመት የመጀመሪያው ግማሽ ዓመት በትግራይ ክልል መቀሌ እና ሁመራ እያንዳንዳቸው 100 ሜጋ ዋት ከፀሃይ ኤሌክትሪክ ሃይል የሚያመነጩ ፕሮጀክቶች ይጀመራሉ።

በኢትዮጵያ ሶማሌ ክልል አይሻ ሁለት 120 ሜጋ  ዋት የንፋስ ሃይል ማመንጫና  በኦሮሚያ ክልል መተሃራ 100 ሜጋ ዋት የፀሃይ እና በአሉቶ ላንጋኖ የከርሰ ምድር ሃይል ማመንጫ ፕሮጀክቶች ሁለት ጉድጓዶች የተጀመሩ ሲሆን ተጨማሪ 24 ጉድጓዶች እስከ ጥር ወር ድረስ ይጀመራሉ።

በተለይ የፀሐይ ሃይል ማመንጫዎች በራስ አቅም የማይቻሉ ስለሆነ  ጥናቱን አጥንቶ፣ግንባታውንም በራሱ አቅም አከናውኖ በቀጣይ 20 ዓመታት ለመንግስት በተመጣጣኝ ዋጋ የሚሸጥ ኩባንያ ለማግኝት ጨረታው ረጅም ጊዜ እንደወሰደ ነው የተገለጸው።

አሁን ግን 18 ዓለም አቀፍ ኩባንያዎች ተለይተው በጨረታ ላይ መሆናቸውን የገለጹት አቶ ብዙነህ በቀጣይ ስድስት ወራትም ስራው እንደሚጀመር ነው ያስረዱት።

257 ሚሊዮን ዶላር ወጭ የሚጠይቀውና 120 ሜጋ ዋት የሚያመነጨው  የአይሻ ቁጥር ሁለትን በተጠናቀቀው በጀት ዓመት ለመጀመር 85 በመቶ ወጪውን በውጭ ብድር ለማግኘት ቢታቀድም ብድሩ ሊገኝ አለመቻሉን ነው የገለጹት ፡፡

በዚሁ ሳቢያም ስራው መዘግየቱን ያስታወሱት አቶ ብዙነህ ''በአሁን ወቅት ብድሩ ከቻይና ኤግዚም ባንክ ስለተገኘ  ከሐምሌ ወር ጀምሮ በቻይና ዶንግ ፉንግ ኮርፖሬሽን ግንባታው ተጀምሯል ''ብለዋል።

በሁለተኛው ዕድገትና ትራንስፎርሜሽን ዘመን መጨረሻ የአገሪቱን የሐይል መጠን 17 ሺህ 347 ሜጋዋት ለማድረስ ታቅዶ እየተሰራ ሲሆን አሁን ያለው 4 ሺህ 315 ሜጋ ዋት መሆኑን ከሚኒስቴሩ የተገኘው መረጃ ያስረዳል።

 

Published in ኢኮኖሚ

አዲስ አበባ ነሀሴ 6/2009 መንግሥት ለወጣቶች የሥራ ዕድል ፈጠራ የመደበውን አስር ቢሊዮን ብር ተንቀሳቃሽ ፈንድ በተለያየ ምክንያት በመዘግየቱ የገጠር ወጣቶችን ተጠቃሚ ለማድረግ እንዳልተቻለ የእርሻና ተፈጥሮ ሀብት ሚኒስቴር አስታወቀ።

በኢትዮጵያ የገጠር ህዝብ ብዛት በየዓመቱ በአንድ ነጥብ ስምንት በመቶ በማደግ ላይ ሲሆን፤ ዕድሜው ለስራ ዝግጁ የሚሆነው ግን በሁለት ነጥብ ስድስት በመቶ እንደሚጨምር የማዕከላዊ ስታስቲክስ ኤጀንሲ  መረጃ ያስረዳል።

ይህም በገጠር የስራ ፈላጊው ቁጥር ከአጠቃላይ የገጠር ነዋሪው ህዝብ ብልጫ  እንዳለው ያሳያል።

በዚህ የሕዝብ ብዛት ትንበያ መሰረት በሚቀጥሉት ዓመታት በገጠር በአማካይ አንድ ሚሊዮን የሚሆን የሰው ኃይል በየዓመቱ ተጨማሪ የሥራ ዕድል ፈላጊ ይሆናል ተብሎ ይገመታል።

በአሁኑ ወቅትም በርካታ የገጠር ወጣቶች ሥራ ፍለጋ ከገጠር ወደ ገጠር እንዲሁም ከገጠር ወደ ከተማ በመፍለስ ላይ ናቸው።

ወጣቶች ወደ ተለያዩ አካባቢዎች ሲፈልሱ በበቂ መረጃ ላይ ተመስርተው ባለመሆኑ በሥራ ፍለጋ ጊዜያቸውን ከማባከን ባለፈ የሚፈልጉትን ውጤት እንዳያገኙ እያደረገ ነው።

ይህን ችግር ለመፍታት መንግሥት በ2008 ዓ.ም 'የገጠር የሥራ ዕድል ፈጠራ ስትራቴጂ ሰነድ' ቀርጾ ወደ ሥራ ገብቷል።

ስትራቴጂው በገጠር የሚኖሩ ሥራ ፈላጊ ወጣቶች በአካባቢያቸው በቂ ሥራ ተፈጥሮላቸው ከአገሪቷ ኢኮኖሚያዊና ማሕበራዊ ዕድገቶች ፍትሃዊ ተጠቃሚ ለማድረግ የተዘጋጀ ነው።

ከዚህ ጎን ለጎን መንግሥት በተጠናቀቀው በጀት ዓመት 'ለወጣቶች የሥራ እድል ፈጠራ' የሚሆን 10 ቢሊዮን ብር ተዘዋዋሪ ፈንድ መድቦ ወደ ሥራ ገብቷል።

ይሁን እንጂ የእርሻና ተፈጥሮ ሀብት ሚኒስትር ዴኤታ አቶ ዳመነ ዳሮታ ለኢዜአ እንደተናገሩት፣የገጠር ሥራ ፈላጊ ወጣቶች መንግሥት ከመደበው ተዘዋዋሪ ፈንድ በተፈለገው ፍጥነት ተጠቃሚ አልሆኑም። 

በአሁን ወቅት በተንቀሳቃሽ ፈንዱ  ምን ያህል ወጣቶች የሥራ ዕድል ተጠቃሚ እንደሆኑ የተደራጀ መረጃ አለመኖሩን ጠቁመው፤ በቅርቡ መረጃውን ተጠናክሮ ይፋ እንደሚደረግም  ሚኒስትር ዴኤታው አቶ ዳመነ አንስተዋል።

ገጠርን የአገልግሎት ማዕከል በማድረግ ወጣቶች ባሉበት አካባቢ የኢኮኖሚ ተጠቃሚ ማድረግና የወጣቶችን ፍልሰት ለማስቀረት በትኩረት እየተሰራ መሆኑንም ሚኒስትር ዴኤታው ገልጸዋል።

ለዚህም የፌዴራል እና የክልል መንግሥታት እንዲሁም አጋር ድርጅቶች የሥራ ዕድል ለመፍጠር ርብርብ እያደረጉ መሆኑንም ነው ያመለከቱት።

በሌላ በኩል በተጠናቀቀው በጀት ዓመት በገጠር የሥራ ዕድል ፈጠራ ስትራቴጂ ከአንድ ሚሊዮን በላይ ለሆኑ ወጣቶች የሥራ ዕድል መፈጠሩን አቶ ዳመነ ገልጸዋል።

ግብርናና ግብርና ነክ፣ ማምረቻ ኢንዱስትሪ፣ ግንባታ፣የምግብ ማቀነባበሪያ፣ንግድና ማዕድን ልማት ለወጣቶቹ ሥራ የተፈጠረባቸው ዘርፎች ናቸው።

በ2009 ዓ.ም የፌደራል መንግስት ለወጣቶች የስራ ዕድል ፈጠራ ስራ 10 ቢሊዮን ብር መድቦ የነበረ ቢሆንም፤ አማራ፣ትግራይና ድሬዳዋ የተለቀቀላቸውን ገንዘብ ሙሉ ለሙሉ ሲጠቀሙ ቀሪዎቹ በጀቱን እንዳተጠቀሙበት መረጃዎች ያመለክታሉ።

Published in ኢኮኖሚ

                      ሰለሞን ተሰራ /ኤዜአ/

ዓለማችን ስፍር ቁጥር የሌላቸው ለውጦች ተፈራርቀውባታል፡፡ ከፖለቲካዊ አብዮቶች “እምቢተኝነት” በተጨማሪ በግብርናው፣ በኢንዱስትሪው፣ በሳይንሱ፣ … መስክ አያሌ ዘመን ቀያሪና ሂደት ለዋጭ አብዮቶችን አስተናግዳለች፡፡

ጌታቸው አሰፋ ጥቅምት 2004 ባሰፈሩት ጽሑፍ እንዳብራሩት እነዚህን አብዮቶች ‘አብዮት’ ያሰኛቸው ከዚያ በፊት የግብርና፣ የኢንዱስትሪ ወይም የሳይንስ … እንቅስቃሴ ወይም ስራ ስላልነበረ አይደለም።

ይልቁንም በመጠናቸውና በአይነታቸው ከተለመደውና ከነበረው አሰራርና አካሄድ ለየት ባለ መልኩ ግብርናው፣ ኢንዱስትሪው፣ ሳይንሱና የመረጃ ቴክኖሎጂው ስለተስፋፋና አገሮች ከተለመደው መንገድ ‘በእምቢታ’ ወጥተው ወደ አዲሱ መንገድ ስለገቡ እንጂ፡፡ አረንጓዴ አብዮትም ይህን ተከትሎ የመጣ ነው፡፡

ታላቁ መሪ መለስ ዜናዊ በዓለማችን ከጊዜ ወደ ጊዜ እየተባባሰ የመጣው የአየር ንብረት ለውጥ በሀገራችንም ሆነ በዓለማችን የሚያደርሰውን ተጽዕኖ በመቀነስና በመቋቋም ረገድ ሀገራት ሊከተሏቸው ስለሚገባቸው አቅጣጫዎችና መውስድ ስለሚገባቸው እርምጃዎችም ጭምር በሳል ሀሳቦችን አንስተዋል፡፡

እስከ ህልፈተ ህይወታቸው ድረስም የሀገራቸውን የአረንጓዴ ልማት ራዕይ ለማሳካትና አቋማቸውንም ለዓለም ዓቀፉ ማህበረሰብ ለማስገንዘብ ደከመኝ ሰለቸኝ ሳይሉ ታግለዋል፡፡

በዴንማርኳ ኮፐንሃገን የተካሄደውን ጉባዔ ባስታወስን ቁጥር የታላቁ መሪ መለስ ዜናዊ አሻራ በግልጽ ያረፈበት የበለጸጉ ሀገራት በአየር ንብረት ለውጡ የጎላ አስተዋጽኦ ለማያደርጉት ግን ደግሞ ከሌሎቹ እኩል የችግሩ ገፈት ቀማሽ  ለሆኑ ደሃ ሀገራት ካሳ ሊከፍሉ ይገባል የሚለው መከራከሪያ ሃሳብ ይታወሰናል፡፡

በኢንዱስትሪ የበለጸጉ ሀገራት በሚለቁት በካይ ጋዝ ለተለያዩ ችግሮች የተጋለጡ ደሀ ሀገራት ተጽእኖውን መቋቋም እንዲችሉ ተገቢውን ካሳ ሊያገኙ ይገባል የሚለው የመከራከሪያ አቋማቸው ሚዛን ደፍቶ ብዙዎችን አግባብቶ እንደነበርም አይዘነጋም፡፡

በጉባዔው ማጠቃለያም  ያደጉ አገሮች እ.ኤ.አ. ከ2010 እስከ 2012 ባሉት ዓመታት ለአፍሪካና ለታናናሽ ደሴቶች የሚውል ተጨማሪ 30 ቢሊዮን ዶላር ድጋፍ ለማድረግ ቃላቸውን ሰጥተው ነበር፡፡

 እ.ኤ.አ ከ2020 ጀምሮ ደግሞ በየዓመቱ መቶ ቢሊዮን ዶላር ሊሰጡ መስማማታቸውም ኢትዮጵያ ለመራችው የተደራዳሪ ቡድን ትልቅ ድል ሆኖ ተመዝግቧል፡፡

ይሁን እንጂ ቃል የተገባውን ገንዘብ ያዋጣሉ ተብለው ሲጠበቁ የነበሩ ሀገራት የተለያዩ ሰበቦችን እየደረደሩ ቃላቸውን በመብላታቸው ታላቁ መሪ የተሟገቱላቸው ሀገራት አሁንም ድረስ ተገቢውን ካሳ አላገኙም፡፡

በታላቁ መሪ መለስ ዜናዊ መሪነት ከ20 የመንግሥት መሥሪያ ቤቶች በተውጣጡ 50 ባለሙያዎች ተሳትፎ የተዘጋጀው የሀገሪቱ አረንጓዴ ኢኮኖሚ ስትራቴጂ፣ የሀገሪቱ ፈጣን እድገት የእርሻ መሬት መጣበብን ጨምሮ የተፈጥሮ ሀብት መራቆትን ሊያስከትል እንደሚችል ያትታል፡፡ የሀገሪቱ እድገት ፈታኝ ተግዳሮት ሊሆን እንደሚችልም በግልጽ አስቀምጧል፡፡

የሀገሪቱን ፈጣን እድገት በአስተማማኝ መሰረት ላይ ለመጣል ያመች ዘንድ ለአየር ንብረት ለውጥ የማይበገር አረንጓዴ ኢኮኖሚ ትኩረት የተሰጠውም ለዚህ ነው፡፡

ስትራቴጂው በተዘጋጀበት ወቅት ይፋ የሆኑ መረጃዎች እንደሚያመለክቱት ለማገዶ ሲባል ከ80 በመቶ በላይ የሚሆነው የአገሪቱ ደን ይጨፈጨፋል፡፡ አረንጓዴው ኢኮኖሚ ከማገዶ እንጨት ፍላጎት ማደግ ጋር ተያይዞ በሀገሪቱ የደን ሀብት ላይ የተደቀነውን አደጋ ለመቀነስ ሁለት ስትራቴጂዎችን አስቀምጧል፡፡

አንደኛው አማራጭ ማገዶ ቆጣቢ ምድጃዎችን ጨምሮ የኤሌክትሪክ፣ የሲሊንደር፣ የባዮጋዝና መሰል የኃይል አማራጮችን  ማስፋፋት ሲሆን ሁለተኛው ደግሞ ዛፎችን መልሶ በመትከል የሀገሪቱን የደን ሽፋን በመጨመር የከባቢ አየር ለውጡን ተጽዕኖ መቋቋም ነው፡፡

የሀገሪቱ አረንጓዴ ኢኮኖሚ ለዓለም ኢኮኖሚም ጭምር አዋጭ ሀሳቦችን አካትቷል፡፡ አገሪቱ የምትከተለው አረንጓዴና ‹‹ያልተበከለ›› የኢኮኖሚ አማራጭ  ከምታመነጨው ዝቅተኛ የበካይ ጋዝ መጠን ጋር ተደማምሮ 80 በመቶው የሚሆነውን በካይ ጋዝ ቋጥሮ ለማስቀረት የምታወጣውን ወጪ ይቀንስላታል፡፡

ክቡር አቶ መለስ ዜናዊ አፍሪካ በተለይም ኢትዮጵያ እየተጓዘች ያለችበት የልማትና እድገት መንገድ በዓለም አቀፍ ደረጃ በሚከሰት የአየር ንብረት ለውጥ ምክንያት እንዳይሰነካከልም ግልጽ የመፍትሄ አቅጣጫዎችን አስቀምጠዋል፤ የመከላከያ ስትራቴጂዎችን በመንደፍም በተግባር አረጋግጠዋል፡፡

በፍጥነት እያንሰራራ ያለውን የኢትዮጵያ ኢኮኖሚ ቀጣይነት ለማረጋገጥ እና ከእድገቱ ጋር ተያይዞ የሚፈጠሩ ሁኔታዎች ለአየር ንብረት ለውጥ መንስኤ እንዳይሆኑ  አዋጪው መንገድ  የአረንጓዴ ኢኮኖሚ ልማት ስትራቴጂን መተግበር ነው በሚለው አቋቸማውም ይታወሳሉ ታላቁ መሪ፡፡

ይህ አቶ መለስ ሲያራምዱት የነበረው አቋምና ቁርጠኝነት ሀገሪቱን በዓለም ዓቀፍ ደረጃ አረንጓዴ ልማት ከሚያራምዱ ሀገራት ውስጥ በመጀመሪያው ረድፍ እንድትሰለፍ አድርጓታል፡፡፡

መላ የኢትዮጵያ ብሔሮች፣ ብሔረሰቦችና ህዝቦች በታላቁ መሪ ህልፈተ ህይወት ማግስት የገቡትን  ቃል አክብረው የአረንጓዴ ኢኮኖሚ ልማት ግንባታ ራዕያቸውን  ለማሳካትና ከግብ ለማድረስ በቁርጠኝነት በመንቀሳቀስ ላይ ይገኛሉ፡፡

ህብረተሰቡ በቁጭትና በእልህ በራሱ ተነሳሽነት የታላቁን መሪ ለከባቢ አየር ለውጥ የማይበገር አረንጓዴ ኢኮኖሚ የመገንባት ራዕይ ለማሳካት ባደረገው ርብርብም የሀገሪቱ የደን ሽፋን እየተሻሻለ መምጣቱን መረጃዎች ይጠቁማሉ፡፡

 

 

Published in ዜና ሓተታ

ጋምቤላ ነሀሴ 6/2009 በጋምቤላ ክልል ከ134 ሺህ ለሚበልጡ ህፃናት የፖሊዮ ክትባትና የቫይታሚን "ኤ" እንክብል ለመስጠት ዝግጅት መደረጉን የክልሉ ጤና ቢሮ አስታወቀ።

በቢሮው የጤና ማበልጸግና የበሽታ መከላከል ወሳኝ የሥራ ሂደት አስተባባሪ አቶ ሪያንግ ፖች ለኢዜአ እንደገለጹት አገልገሎቱ የሚሰጠው ስድስት የስደተኛ መጠለያ ጣቢያዎችን ጨምሮ በክልሉ በሚገኙ 13 ወረዳዎችና በጋምቤላ ከተማ ነው።

ከነሐሴ 12 ቀን 2009 ጀምሮ ለአምስት ተከታታይ ቀናት በሚቆየው ዘመቻ ዕድሜያቸው ከአምስት ዓመት በታች ለሆኑ ከ134 ሺህ በላይ ህፃናት የፖሊዮ ክትባት እንደሚሰጣቸው ተናግረዋል።

"እድሚያቸው በስድስት ወራትና በአምስት ዓመት መካከል ለሚገኙ ከ89 ሺህ ለሚበልጡ ህፃናት ደግሞ ተጨማሪ የቫይታሚን ’’ኤ’’ እንክብል ይሰጣቸዋል "ብለዋል።

በሁለትና በአምስት ዓመት የእድሜ ክልል 70 ሺህ 879 ህፃናት ከፖሊዮ ክትባትና ከቫታሚን’’ ኤ’’ እንክብል  በተጨማሪ የሆድ ጥገኛ ተህዋሲያን ህክምና እንደሚሰጣቸውም አመልክተዋል።

በዘመቻው ከ89 ሺህ በሚበልጡ ህፃናትና በ21 ሺህ ነፍሰ ጡርና የሚያጠቡ እናቶች ላይ ከሚከናወነው የምግብ እጥረት ምርመራና ልየታ በተጨማሪ የከንፈርና የላንቃ መሰንጠቅ ያላባቸው ህፃናት ምዝገባ እንደሚካሔድም አስረድተዋል።

የቫይታሚን ''ኤ'' እንክብል እደላና የሆድ ጥገኛ ተህዋሲያን የህክምና አገልግሎት በጊዜያዊነት በተቋቋሙ 293 ጣቢያዎች የሚሰጥ ሲሆን  የፖሊዮ ክትባቱ ቤት ለቤት የሚከናወን ነው።

ከአንድ ሺህ 465 በላይ የጤና ባለሙያዎችና በጎ ፍቃደኞች ለሚሰማሩበት ለዚህ ዘመቻ ማስፈጸሚያ በተባበሩት መንግስታት የህጻናት መርጃ ድርጅትና የዓለም ጤና ድርጅት ከ3 ሚሊዮን ብር በላይ በጀት መመደባቸውን አስታውቀዋል።

በአገልግሎቱ ተጠቃሚ ከሚሆኑት ከ134 ሺህ በላይ ህጻናት መካከል መካከል 67 ሺህ 960 የሚሆኑት በስድስቱ የስደተኛ መጠለያ ጣቢያዎች የሚገኙ ህፃናት መሆናቸውን ከክልሉ ጤና ቢሮ የተገኘው መረጃ ያመለክታል።

 

Published in ማህበራዊ

አሶሳ ነሀሴ 6/2009 የመድኃኒትና የሕክምና መሳሪያዎችን በሚፈለገው ጊዜ፣ ጥራትና መጠን ለማቅረብ የውስጥ አሰራሩንና የግዥ ሥርአቱን እንደሚያሻሽል የኢትዮጵያ መድኃኒት ፈንድና አቅርቦት ኤጀንሲ አስታወቀ፡፡

የኤጀንሲው ዋና ዳይሬክተር ዶክተር ሎኮ አብርሐም እንዳሉት በተያዘው አዲሱ በጀት ዓመት ኤጀንሲው የውስጥ አሰራሩን በማሻሻል አገልግሎቱን ቀልጣፋ ለማድረግ ይሰራል፡፡

በአሁኑ ወቅትም ብዙ ጊዜ እጥረት የሚከሰትባቸውን መሰረታዊ መድኃኒቶችን አቅርቦት ለማሻሻል ቴክኒካል ቡድን የማዋቀር ሥራ መከናወኑን ተናግረዋል፡፡

ቡድኑ የመድኃኒቶችን የግዢ ሂደት ከመከታተል ባለፈ የተለያዩ አማራጮችን በመጠቀም በወቅቱ እንዲደርሱ ጥረት የሚያደርግ መሆኑን ጠቁመዋል።

በእዚህም ባለፈው በጀት ዓመት 85 በመቶ የደረሰው የመሰረታዊ መድኃኒቶችን አቅርቦት በተያዘው በጀት ዓመትም 95 በመቶ ለማድረስ በትኩረት እንደሚሰራ ገልፀዋል፡፡

የሕክምና መገልገያ መሳሪያዎችን አቅርቦት ለማሻሻልም ኤጀንሲው የአሰራር ስርዓት በመዘጋት ላይ ይገኛል።

ለእዚህም በቀላሉ የማይበላሹና በአነስተኛ ወጪ ሊገዙ የሚችሉ የሕክምና መሳሪያዎችን በራሱ ገዝቶ የሚያቀርብ ሲሆን ከፍተኛ ወጪና ቦታ የሚይዙ መሳሪያዎችን ደግሞ የሕክምና ተቋማትን ፍላጎት መሰረት በማድረግ በዓመት ሁለት ጊዜ ብቻ ግዢ ለመፈፀም ማቀዱን አስረድተዋል፡፡

ይህ አሰራር በተደጋጋሚና በተጠናጥል የሚፈጸሙ ግዢዎችን በማስቀረት ወጪንና ጊዜን መቆጠብ እንደሚያስችል ተናግረዋል፡፡

ከኤጅንሲው ጋር ውል የሚገቡ አካላት ከአንድ ዓመት በታች የመጠቀሚያ ጊዜ ያላቸውን መድኃኒቶች ለመረከብ ፍቃደኛ አለመሆን መድኃኒቶች ከሚበላሹበት ዋነኛ ምክንያት መሆኑን ዶክተር ሎኮ ገልፀዋል፡፡

በሚሻሻለው የኤጀንሲው አሰራር የመጠቀሚያ ጊዜያቸው ሊያልፍ የተቃረቡ መድኃኒቶችን ለይቶ መድኃኒቶቹን ወደሚፈልጉ አካባቢዎች በማዘዋወር ጥቅም ላይ እንዲውሉ ይደርጋል፡፡

ከእዚህ በተጨማሪ ለሕክምና ተቋማት መድኃኒቶቹን በነጻ በመስጠትም ከብልሽት ለመታደግ እንደሚሰራ ነው የገለጹት።  

ኤጀንሲው በ2009 በጀት ዓመት ከ8 ነጥብ 5 ቢሊዮን ብር በላይ ዋጋ ያላቸውን የመድኃኒትና የሕክምና መገልገያ መሳሪያዎች ግዥ ፈፅሟል፡፡

ከግዢ ፣ ከነበረው ክምችት እንዲሁም ከአጋር አካላት ያገኘውን ድጋፍ በማካተት በአጠቃላይ በዓመቱ ከ13 ነጥብ 5 ቢሊዮን ብር በላይ ዋጋ ያላቸው መድኃኒቶችንና የሕክምና መገልገያ መሳሪያዎችን አሰራጭቷል።

በተያዘው በጀት ዓመት ከ15 ቢሊዮን ብር በላይ ዋጋ ያላቸውን መድኃኒቶችና የሕክምና መገልገያ መሳሪያዎችን ገዝቶ ለማሰራጨት ማቀዱንም ዶክተር ሎኮ ገልጸዋል።

በኤጀንሲው የ2009 በጀት ዓመት ዕቅድ አፈጻጸምና በ2010 በጀት ዓመት ዕቅድ ላይ በአሶሳ ከተማ ለሦስት ቀናት ሲካሄድ የነበረው ግምገማና ውይይት ትናንት ተጠናቋል፡፡

Published in ማህበራዊ

አዲስ አበባ ነሀሴ 6/2009 አገር አቀፍ የፖለቲካ ፓርቲዎቹ መንግስት ፓርቲዎቹ የዕለት ተዕለት ሥራ ማከናወኛ የሚውል ድጋፍ ለማድረግ እንዲችል በምዝገባ አዋጅ አዲስ ንኡስ አንቀፅ እንዲካተት ተስማሙ።

አገር አቀፍ የፖለቲካ ፓርቲዎች በፖለቲካ ፓርቲዎች ምዝገባ አዋጅ ቁጥር 573/2000 ላይ ሲያካሂዱ የቆዩትን ድርድር ዛሬ አጠናቀዋል።

ፓርቲዎቹ በአዋጁ ከአንቀፅ 42 እስከ 63 የተዘረዘሩት ስለፖለቲካ ፓርቲዎች የገቢ ምንጭ እና የንብረት ሁኔታ፣ የተከለከሉ ተግባራት እና የሚወሰዱ እርምጃዎች እንዲሁም ልዩ ልዩ ድንጋጌዎች ላይ ድርድር አድርገዋል።

ፓርቲዎቹ ባካሄዱት ድርድር  መንግስት ለፖለቲካ ፓርቲዎች የዕለት ተዕለት ሥራ ማስኬጃ የሚውል ድጋፍ የሚያደርግበት አዲስ ንዑስ አንቀፅ እንዲካተት ተስማምተዋል። 

የሚድያ ኮሚቴ አባልና የኢዴህ ምክትል ሊቀመንበር አቶ ገብሩ በርሄ እንዳሉት፤ በአዋጁ ቁጥር 573/2000 መሰረት ቀደም ብሎ ለፖለቲካ ፓርቲዎች ድጋፍ የሚሰጠው ለፌዴራልና ለክልል ምክር ቤቶች ምርጫ ውድድር በሚያካሂዱበት ወቅት ለሚያከናውኗቸው ተግባራት የሚውል ነበር።

ዛሬ ባከሄዱት ድርድር ፓርቲዎቹ  በደረሱበት ስምምነት መሰረት መንግስት በየዓመቱ ለፖለቲካ ፓርቲዎች የዕለት ተዕለት ሥራ ማከናወኛ የሚውል ድጋፍ ለመስጠት የሚያስችለው አዲስ ንዑስ አንቀፅ ይካተታል፡፡ 

በዚህ መሰረት ከአባላት መዋጮ፣ ከዜጎችና ከአገር በቀል ኩባንያዎች የሚሰጥ ድጋፍና በሚያካሄዱት ባዛር ከሚገኝ ገቢ በተጨማሪ በሚካተተው ንዑስ አንቀጽ መሰረት "መንግስት የሚሰጠውን የዕለት ተዕለት ሥራ ማከናወኛ ድጋፍ ያገኛሉ" ብለዋል።

ፓርቲዎች ይሄን ድጋፍ የሚያገኙት በአዋጁ አንቀፅ 45 ንኡስ አንቀፅ 2 መሰረት "ባገኙት ድምፅና ባቀረቡት ዕጩ ብዛት፣ ባቀረቡት የሴቶች ዕጩ ብዛትና በምክር ቤት ባላቸው ወንበር መሰረት ይሆናል" በሚል እንዲሻሻል ተደርጓል።

የሚድያ ኮሚቴ ሰብሳቢ አምበሳደር ደግፌ ቡላ በበኩላቸው የምርጫ ቦርድ ፓርቲዎችን በማሳተፍ በሚያወጣው መመሪያ መሰረት እንደሚከናወን ጠቁመው በዚህም አዋጁ አንቀፅ 45 ንኡስ አንቀፅ 4 እንዲሻሻል መደረጉን ተናግረዋል።

ፓርቲዎቹ በምርጫ ቦርድ ፓርቲዎችን የመሰረዝ ስልጣን ላይ ሰፊ ድርድር አድርገዋል።

ይሁን እንጂ ፓርቲዎችን የመሰረዝ ስልጣን የቦርዱ ሆኖ ባለበት እንዲቀጥል በተባበረ ድምፅ ተስማምተዋል።

በአዋጁ ልዩ ድንጋጌዎች ውስጥ ከተዘረዘሩት አንቀጾች መካከል አንቀፅ 59 የምርጫ ቦርድ በከፊል የዳኝነት ስልጣኑ ያስተላለፋቸው ውሳኔዎች ሳይፈፀሙ ቢቀር በራሱ የሚወስናቸው እርምጃዎች እንደተጠበቁ ሆነው "ቦርዱ ለፌዴራል የመጀመሪያ ደረጃ ፍርድ ቤት አፈፃፀም ከፍቶ ሊያስፈፅም ይችላል" በሚል እንዲሻሻል ተስማምተዋል።

ፓርቲዎቹ በዛሬው ድርድራቸው ፓርቲዎች ጽህፈት ቤት እንዳይኖራቸው የሚያደናቅፉ አካላት በህግ የሚጠይቁበት አንቀፅ እንዲካተትም ተስማምተዋል።

እንዲሁም አንቀፅ 55 ንኡስ አንቀፅ 3 ላይ “ማንኛውም የፖለቲካ ፓርቲ አባል በማንኛውም ጊዜ ለስራ መሰናክል ሳይሆን አባል የሆነበትን የፓርቲውን የገቢና ወጭ ሂሳብ መረጃ የማግኘት መብት አለው” በሚል የተቀመጠው እንዲሰረዝ ወስነዋል።

ከላይ የተጠቀሱትን ጨምሮ በርካታ የተሻሻሉና አዳዲስ አንቀፆች ተጨምረውበት የየፖለቲካ ፓርቲዎች የምዝገባ አዋጁ በረቂቅ አዋጅ መልክ ተዋቅሮ እንዲቀርብ ፓርቲዎቹ ከስምምነት ደርሰዋል።

ፓርቲዎቹ ዛሬ ባካሄዱት ድርድር ላይ አዲስ የሚዲያ ኮሚቴ ያዋቀሩ ሲሆን፤ ከገዢው ፓርቲ አምበሳደር ደግፌ ቡላ፣ የኢትዮጵያ ዴሞክራሲያዊ ህብረት ምክትል ሊቀመንበር አቶ ገብሩ በርሄ እና የመላው ኢትዮጵያውያን ዴሞክራሲያዊ ፓርቲ ዋና ፀሓፊ አቶ ዘመኑ ሞላ ተመርጠዋል።

ገዢው ፓርቲ የድርድሩ ቀን ይራዘም በማለት ባቀረበው ጥያቄ መሰረት ቀጣዩ ድርድር መስከረም የመጀመሪያ ሳምንት ላይ በምርጫ ህጉ አዋጅ 532/1999 ድርድሩ እንዲቀጥል ተስማምተዋል።

Published in ፖለቲካ

አዲስ አበባ ነሀሴ 6/2009 የታላቁ ህዳሴ ግድብ የኃይል ማመንጫ ተርባይኑን ከጉዳት የሚከላከለው ''ትራሽራክያ'' የተሰኘውን መሣርያ ማምረቱን የብረታ ብረትና ኢንጅነሪንግ ኮርፖሬሽን ገለጸ።

''ትራሽራክያ'' የተሰኘው ይህ መሳሪያ ከግድቡ ወደ ተርባይኑ በሚሄደው ውሃ ውስጥ ድንጋይ፣ እንጨትና ሌሎች አላስፈላጊ ነገሮች ተቀላቅለው ተርባዩኑን እንዳይጎዱት የያደርግ ነው።

የግድቡ ግንባታ ሙሉ ለሙሉ ተጠናቆ ወደ ሃይል ማመንጨት ሲሸጋገር በድምሩ 16 ትራሽራክያ ወይም የሃይል ማመንጫ ተርባይን መከላከያ የሚያስፈልግ ሲሆን አሁን በኮርፖሬሽኑ የተጠናቀቀው ቀድመው ሃይል ለሚያመነጩት ሁለት ተርባይኖች ብቻ ነው።

በኮርፖሬሽኑ የኢትዮጵያ ፖዎር ኢንጅነሪንግ ኢንዱስትሪ የተርባይን ፋብሪካ ኃላፊ መቶ አለቃ ፀጋይ ገብረእግዚአብሔር ለኢዜአ እንደገለጹት  50 ቶን ክብደትና 21 ሜትር ርዝመት ያለው ይህ መሣሪያ የማምረቱ ሥራው ተጠናቋል።

በተርባይን ፋብሪካ የዲዛይን ክፍል ኃላፊ ኢንጅነር ቢንያም ወልደየስ እንደገለጹት በፋብሪካው የግድቡን የኤሌክትሮ መካኒካል አካላትን ዲዛይን በማድረግ የማምረት ሥራው እየተካሄደ ነው።

የመገናኛና ኢንፎርሜሽን ቴክኖሎጂ ሚኒስትርና የኢትዮጵያ ኤሌክትሪክ ኃይል ስራ አመራር ቦርድ ሰብሳቢ ዶክተር ደብረፅዮን ገብረሚካኤል በበኩላቸው የግድቡ የሲቪልና የመካኒካል ስራዎች በአማካሪው ኩባንያ በኩል የጥራት ክትትልና ድጋፍ እየተደረገበት መሆኑን ገልጸዋል።

እያንዳንዱ የግድቡ የሃይድሮና ኤሌክትሮ መካኒካል ስራ ከዲዛይኑ ጀምሮ የማምረት፣ የመገጣጠምና መትከል ስራዎች በአማካሪዎች በኩል የጥራት ክትትልና ድጋፍ እየተደረገበት መሆኑን ገልጸዋል።

የኤሌክትሮ መካኒካል ስራው የግድቡን ጥራት ከማስጠበቅ ጎን ለጎን የቴክኖሎጂ ሽግግሩን የተሟላ እንዲያደርገው እየተሰራ መሆኑን ዶክተር ደብረፅዮን አስታውቀዋል።

ይህን ከማስፈፀም አኳያ በዓለም ዓቀፍ ደረጃ በርካታ ግድቦችን በመስራት በዘርፉ ታዋቂነት ያተረፉ ባለሙያዎች መቀጠራቸውን ተናግረዋል።

ቀደም ሲል በተሰራው የግድቡ የሲቪልና የመካኒካል ስራ ላይ የዲዛይን ለውጥ ማሻሻያ በማድረግ የግድቡን ኃይል የማመንጨት አቅም ወደ  6 ሺ 450 ሜጋዋት ከፍ እንዲል ተደርጓል።

ታላቁ የኢትዮጵያ ህዳሴ ግድብ ሲጀመር 5 ሺ 250 ሜጋ ዋት ኃይል እንዲያመነጭ ታስቦ ቢሆንም በጊዜ ሒደት የተጨመረው 1 ሺ 200 ሜጋ ዋት ኃይል የበለስ፣የተከዜና የጊቤ ሁለት ግድቦች በጋራ የሚያመነጩትን ኃይል ይስተካከላል።

የታላቁ ህዳሴ ግድብ ግንባታ 60 በመቶ ያህሉ መጠናቀቁ ከኢትዮጵያ ኤሌክትሪክ ሃይል የተገኘው መረጃ ይጠቁማል።

Published in ኢኮኖሚ
Published in ቪዲዮ
Page 1 of 4

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->