አርዕስተ ዜና
Items filtered by date: Thursday, 12 October 2017

አዲስ አበባ ጥቅምት 2/2010 ሕገ ወጥ የሰዎች ዝውውርና የስደትን አስከፊነት በተመለከተ በሙዚቃ፣ በቴአትርና በጭውውት የሚቀርብ የግንዛቤ ማስጨበጫ ትርኢት ዛሬ በብሔራዊ ቴአትር  ተጀመረ።

ሕገ ወጥ የሰዎች ዝውውር፣ ሕገ ወጥ ስደትና አስከፊ ገጠመኞችን ተንተርሶ  ግንዛቤ የሚሰጠው አዝናኝ ትርኢት እስከ ወረዳ ድረስ ባሉ እርከኖች እንደሚታይ ተገልጿል።

ትዕይንቱን የኔዘርላንድ ኤምባሲ፣ ጠቅላይ ዐቃቤ ሕግና የኢትዮጵያ ብሔራዊ ቴአትር በጋራ አቅርበውታል።

በቀረበው ትርኢት ላይ ወጣት ሴትና ወንዶች እንዲሁም እድሜያቸው ለአቅመ አዳም ያልደረሱ ህፃናት በሕገ ወጥ ደላሎች አማላይነት ተታለው በጉዞ ላይ የሚደርስባቸው ስቃይና እንግልት ታይቷል።

ስደተኞች ከአገር ሲወጡ ለደላሎች ከሚከፍሉት በርካታ ገንዘብ በተጨማሪ ለግድያና ለአስገድዶ መድፈር ይጋለጣሉ።

"ደላሎች ሴቶችን ሜዲትራኒያን ባሕርን እናሻግራችኋለን" በማለት ገንዘባቸውን ከተቀበሉ በኋላ አስገድደው በመድፈር ለአካል፣ ለጤና እና ለስነ ልቦና ጉዳት እንደሚዳርጓቸውም የቀረበው ትርኢት አሳይቷል።

ድህነት፣ ስራ አጥነት፣ የአመለካከት ችግር፣ የተሻለ ኑሮ ፍለጋ፣ የቤተሰብና የጓደኛ ግፊት ለሕገ ወጥ የሰዎች ዝውውር የሚገፋፉ ድርጊቶች ናቸው።

የፌዴራል ጠቅላይ ዐቃቤ ሕግ ምክትል ዐቃቤ ሕግ አቶ ተካ ገብረኪዳን በወቅቱ እንደገለጹት፤ ትርኢቱ ዜጎች የተሻለ ኑሮ በመፈለግ በሕገ ወጥ መንገድ ከአገር ወጥተው የሚደርስባቸውን ስቃይ "ኅብረተሰቡ በውል እንዲረዳውና እንዲገነዘበው ፋይዳው የጎላ ነው" ብለዋል።

"ኅብረተሰቡ ስለ ሕገወጥ  ስደት ያለውን ግንዛቤ ከማሳደግ በተጨማሪ፤ ሰዎችን ወደ ስደት የሚያማልሉ ሕገወጥ ደላሎችን ተጠያቂ የሚያደርግ ኮሚቴ ተቋቁሞ እየተሰራ ነው" ብለዋል አቶ ተካ።

ሕገ ወጥ የሰዎች ዝውውር ተከላካይ ግብር ኃይል በፈዴራል ጠቅላይ ዐቃቤ ሕግ ስር ከተለያዩ የኅብረተሰብ ክፍሎች በመውጣጣት ተቋቁሟል።

"የማይጨበጥ ተስፋ በመዝራት ዜጎች በአገራቸው ጥረው ግረው እንዳይለወጡ የሚያደርጉ ደላሎች የሰዎች ሕገወጥ ዝውውር እንዲባባስ አድርገውታል" ያሉት አቶ ተካ፤ የዜጎችን ሕይወት ለመታደግና ወንጀለኞች እንዲቀጡ የሚያደርግ የሕግ ማዕቀፍ መዘጋጀቱንም ጠቅሰዋል።

የኔዘርላንድ ኤምባሲ ተወካይ ማርቲን ኮፐር በበኩላቸው እንደተናገሩት፤ ዓለም አቀፍ መልክ የያዘውን ስደት ለመግታት እስከ ታችኛው የኅብረተሰብ ክፍል ወርዶ መስራት ቀዳሚ ተግባር ነው። ሁሉም ሰው ሕገ ወጥ ስደትን ለመከላከል መተባበር አለበት።

 ሕገ ወጥ የሰዎች ዝውውርና ስደት ላይ ኅብረተሰቡ ያለውን ግንዛቤ  ለማሳደግ ወረዳዎች ድረስ በመውረድ በሙዚቃ፣ በቴአትርና በጭውውት መልክ ትዕይንት ለማቅረብ የኔዘርላንድ መንግሥት ፕሮጀክት መንደፉን ተወካዩ ገልጸዋል።

በቀጣይም ፕሮጀክቱ ስደት በስፋት በሚስተዋልባቸው የአገሪቷ አካባቢዎች በመዘዋወር ትርኢቱን ለማቅረብ እንደተዘጋጀ ገልጸው፤ የኔዘርላንድ መንግሥትም በገንዘብ ድጋፍ እንደሚያደርግ ተናግረዋል።

 

Published in ማህበራዊ

አዲስ አበባ  ጥቅምት 2/2010  የደቡብ ኢትዮጵያ ህዝቦች ዴሞክራሲያዊ ንቅናቄ ባለፉት 25 ዓመታት  ለክልሉ ህዝቦች ማህበራዊና ኢኮኖሚዊ ተጠቃሚነትን የሚያረጋግጡ ውጤታማ ተግባራት መከናወኑን የድርጅቱ አመራርና አባላት ገለጹ።

 የውጭ ጉዳይ ሚኒስቴር ሰራተኞች አመራሮችና አባላት ድርጅቱ የተመሰረተበትን 25ኛ ዓመት በዓል ከእህት ድርጅቶች ጋር ዛሬ በተለያዩ ዝግጅቶች አክብረዋል።

  የደኢህዴን ማዕከላዊ ኮሚቴ አባል አቶ ዮናስ ዮሴፍ እንደገለጹት፤ በ25 ዓመታት ውስጥ በክልሉ የጤና ተቋማት ግንባታ ተደራሽ በመደረጉ የህብረተሰቡን የጤና አገልግሎት ሽፋን ማሳደግ ተችሏል።

 በክልሉ ከዞን እስከ ቀበሌ የጤና ኤክስቴንሽን ባለሙያዎችን በማሰማራት የተሳለጠ የጤና አገልግሎት ለመስጠት ተችሏል ብለዋል።

 በከተሞች የሚኖሩ ህዝቦች ማህበራዊና ኢኮኖሚያዊ ተጠቃሚነት እንዲረጋገጥና የልማቱ ፍትሐዊ ተጠቃሚ እንዲሆኑ የሚያስችል የከተማ ልማት ፖሊሲ በመቅረጽ ተግባራዊ መደረጉን አበረታች ውጤት መገኘቱን ነው አቶ ዮናስ የገለጹት።

 ጠባብነት፣ የኪራይ ሰብሳቢነት አመለካከትና ምግባርብልሹ አሰራር፣ ሙስናና ሌሎች የልማት ማነቆዎችን በመታገል ህዝቡ ይበልጥ ተጠቃሚ እንዲሆን የማድረግ ስራ "የድርጅቱ ቀጣይ የትኩረት አቅጣጫ ነው" ብለዋል።

 አምባሳደር ሌላአለም ገብረዮሐንስ በበኩላቸው፤ በትምህርት ዘርፍ  ህብረተሰቡን ተደራሽ ለማድረግ የሚያስችሉ ስራዎች መከናወናቸውን ገልጸዋል።

 በክልሉ ብዙ ቋንቋዎች በመኖራቸው ህብረተሰቡ በራሱ ቋንቋ የትምህርት ስርአት ተቀርፆለት እንዲማር መደረጉን አስታውሰው፤ ይህም እንደ "ትልቅ ስኬት መሆኑን"  አምባሳደሯ ተናግረዋል።

 በክልሉ የከፍተኛ ትምህርት ተቋማት ቁጥር ማደጉንና ይህም የትምህርት ተደራሽነትን ለማስፋት ጉልህ ሚና መጫወቱን አክለዋል።

 በቀጣይም የተከናወኑ ስራዎችን ይበልጥ አጠናክሮ በመቀጠልና  የክልሉ ህዝብ የሚያነሳቸውን የመልካም አስተዳደር ችግሮች መፍታት ትኩረት ተሰጥቶበት እንደሚሰራም ጠቁመዋል።

 በተለይም ከቦታ ቦታ የሚንቀሳቀሱትን አርብቶ አደሮች በአንድ ቦታ በማስፈር የትምህርትና የጤና አገልግሎቶችን እንዲያገኙና ተጠቃሚ እንዲሆኑ የማድረግ ስራ መሰራቱን ተጠቁሟል።

 አርብቶ አደሮቹን ወደ ከፊል አርብቶ አደርነት በመቀየር  ከእንስሳት እርባታ በተጨማሪ የግብርና ምርቶችን አምርተው ለገበያ በማቅረብ የኢኮኖሚ ተጠቃሚነታቸው እንዲያድግ መደረጉንም ነው ተብራርቷል።

 የደቡብ ኢትዮጵያ ህዝቦች ዴሞክራሲያዊ ንቅናቄ (ደኢህዴን) መስከረም 29 ቀን 1985 ዓ.ም መመስረቱ ይታወቃል።

Published in ፖለቲካ

ጋምቤላ ጥቅምት 2/2010 በጋምቤላ ክልል የተሻሻሉ የግብርና ቴክኖሎጂዎችን በመጠቀም ምርትና ምርታማነትን ለማሳደግ የሚደረገው ጥረት ውስንነት እንዳለበት ተገለጸ፡፡

በክልሉ ግብርና ቢሮ አዘጋጅነት በግብርና መካናይዜሽን አሰራር ዙሪያ የሚመክር የውይይት መድረክ በጋምቤላ ከተማ ተካሂዷል፡፡

በመድረኩ ላይ አስተያየታቸውን ለኢዜአ የሰጡ ተሳታፊዎች እንዳሉት፣ በተለይም የአርሶአደሮችን የአስተራረስ ዘዴ ይቀይራሉ ተብለው የተገዙና በእርዳታ የተገኙ ትራክተሮች ለታለመላቸው አገልግሎት በአግባቡ እየዋሉ አይደሉም።

በእዚህም የተሻሻሉ ቴክኖሎጂዎችን ለአርሶና ከፊል አርብቶ አደሩ በአግባቡ አለመተዋወቃቸው ለምርታማነት መቀነስ በምክንያትነት ተጠቅሰዋል ።

ከተሳታፊዎቹ መካከል የጎግ ወረዳ አስተዳዳሪ አቶ አቡላ ኡሪክ እንዳሉት የአርሶአደሩን የአስተራረስ ዘዴ ይቀየራሉ ተብለው ወደ ክልሉ የገቡ  ትራክተሮች በጥንቃቄ ባለመያዛቸው ለተፈለገው አላማ ሳይውሉ ለብልሽት እየተዳረጉ ነው ።

በተለይም ትራክተሮቹ ከተፈቀደላቸው ሥራ ውጭ ለውሃ ማፋሰሻ ቦዮች ቁፋሮ እየዋሉ ከመሆኑም በተጨማሪ የትራንስፖርት አገልግሎት እየሰጡ መሆናቸውን ተናግረዋል፡፡

የኑዌር ዞን ግብርና ጽህፈት ቤት ኃላፊ አቶ ያንግ ቾል በበኩላቸው የክልሉን አርሶና ከፊል አርብቶአደሮችን ኑሮ ያሻሽላሉ ተብለው የተገዙ ትራክተሮች ከታለመለት አላማ ውጪ የወረዳ ኃላፊዎች ለባለሀብቶች እንደሚያከራዩና ለብልሽት እየተዳረጉ መሆናቸውንም ተናግረዋል፡፡

ይህም በክልሉ ምርታማነትን ለማሳደግ በሚደረገው ጥረት ተጽዕኖ ስላለው የክልሉ መንግስትም ሆነ ሌሎች የሚመለከታቸው አካላት ድርጊቱን በሚፈጽሙ ወረዳዎች ላይ ክትትልና ቁጥጥር በማድረግ በኩል በትኩረት ሊሰሩ እንደሚገባም ጠይቀዋል፡፡

በዘርፉ የወጣቶችን የሥራ ዕድል ተጠቃሚነት ለማረጋገጥ የሚደረገው እንቅስቃሴም ውስንነት እንዳለበትና ወደፊት ወጣቶችን በማሳተፍ በኩል የክልሉ መንግስት ትኩረት ሰጥቶ ሊሰራ እንደሚገባም ጠቁመዋል፡፡

"በተለይም በክልሉ ያለውን ሰፊ የእርሻ መሬት ተጠቅሞ የክልሉን ወጣት ወደ ግብርናው ዘርፍ በማምጣት ምርትና ምርታማነትን ለማሳደግ የሚደረገው እንቅስቃሴ ውጤታማ እንዲሆን መስራት ይገባል" ብለዋል።

በክልሉ በተለይ የደረሰ ሰብል በሚሰበሰብበት ወቅት የሚስተዋል የምርት ብክነትን ለማስቀረት እየተደረገ ያለው ጥረት ዝቅተኛ በመሆኑ ለምርት መቀነስ ተጠቃሽ ምክንያት መሆኑን የገለጹት ደግሞ አቶ እስማኤል ገለ ናቸው፡፡

"ችግሩን ለመፍታት የክልሉ ግብርና ቢሮም ሆነ የሚመለከታቸው ባለድርሻ አካላት የጋራ ጥረት ይጠይቃል" ያሉት አቶ እስማየል፣ በክልሉ ምርትና ምርታማነትን በማሳደግ የምግብ ዋስትና ለማረጋገጥና የወጣቱን ተጠቃሚነት ለማሳደግ መስራት እንደሚገባ ጠቁመዋል፡፡

የክልሉ እርሻና ተፈጥሮ ሀብት ቢሮ ኃላፊ ዶክተር ሎው አቡፕ በበኩላቸው የክልሉን ሕብረተሰብ ኋላቀር የአስተራረስ ዘዴ ለማሻሻል የመጡ ትራክተሮች ላልተፈለገ ሥራ እየዋሉ መሆናቸውን አምነዋል።

ቢሮው ከእዚህ በፊት ይህን በሚፈጽሙ አካላት ላይ እርምጃ ሳይወሰድ መቆየቱን ገልጸው፣ በቀጣይ እንደህ አይነት ተግባር የሚፈጽሙ አካላት ላይ እርምጃ እንደሚወስድ አመልክተዋል

ወረዳዎች ትራክተሮቹን ለታለመላቸው ዓላማ አንዲውሉ ከማድረግ ባለፈ በጥንቃቄ በመያዝ መጠቀም እንዳለባቸውም ዶክተር ሎው አሳስበዋል፡፡

የክልሉ ግብርና ቢሮ ከወረዳዎች አቅም በላይ የሆኑ ቴክኒካዊና ሙያዊ ስልጠናዎችን ለመስጠት እንዲሁም ሌሎች መሰል ድጋፎችን ለመስጠት ዝግጁ  መሆኑን ዶክተር ሎው አረጋግጠዋል፡፡

የክልሉ እርሻና ተፈጥሮ ሀብት ቢሮ በክልሉ ምርትና ምርታማነትን ለማሳደግ የተለያዩ ጥረቶችን በማድረግ ላይ መሆኑንም ጠቁመዋል።

በክልሉ ለሚገኙ የተለያዩ ወረዳዎች ለአርሶና ከፊል አርብቶ አደሮች አገልግሎት እንዲሰጡ ታስበው ከተከፋፈሉ 32 ትራክተሮች መካከል አምስቱ በብልሽት አገልግሎት አይሰጡም፡፡

 

Published in ኢኮኖሚ

 አዲስ አበባ  ጥቅምት 2/2010  ጠቅላይ ሚኒስትር ኃይለማሪያም ደሳለኝ ከአሜሪካ ሴኔትና ኮንግረስ አባላት ጋር በሠላምና ጸጥታ ማስከበር ጉዳዮች ላይ ተወያዩ።

 የኢትዮጵያና የአሜሪካን ግንኙነት ይበልጥ ለማሳደግ ከኮንግረሱም ሆነ ከሴኔቱ ምክር ቤቶች ጋር ያለው ግንኙነት እንደሚጠናከር ተገልጿል።

 በውይይቱ ምክትል ጠቅላይ ሚኒስትር ደመቀ መኮንን፣ የክልል ፕሬዚዳንቶችና ከፍተኛ የመንግስት የስራ ኃላፊዎች ተሳትፈዋል።

ውይይቱን የተከታተሉት የውጭ ጉዳይ ሚኒስትር ዶክተር ወርቅነህ ገበየሁ እንደገለጹት ኢትዮጵያና አሜሪካ በውጭ ግንኙነት መርህ መሠረት በርካታ ስራዎችን በጋራ እየሰሩ ይገኛሉ።

 ከጸጥታ ጋር ተያይዞ በአፍሪካ ቀንድ የሚስተዋለውን ዓለም ዓቀፍ ሽብርተኝነት ለመዋጋት በጋራ መስራታቸውን መጥቀስ ይቻላል ብለዋል።

 ለሴኔቱ አባላትም እነዚህ ስራዎች ወደፊትም ይበልጥ ተጠናከረው እንዲቀጥሉ ኢትዮጵያ አሁን እያበረከተች ያለውን አስተዋጽኦ አጠናክራ እንደምትቀጥል ተገልጾላቸዋል ነው ያሉት።

 በተጨማሪም ሴናተሮቹ ኢትዮጵያን በደንብ የሚያውቁ፣ የሚወዱና የኢትዮጵያ ህዝቦችን ሁኔታ ጠንቅቀው የተረዱ በመሆናቸው ከአሜሪካ ጋር ያለውን ግንኙነት የበለጠ ያጠናክረዋል ብለዋል።

 የሴኔቱ አባላት ተወካይ ሴናተር ጀምስ ኢንሆፍ በበኩላቸው ላለፉት 23 ዓመታት የኢትዮጵ­ያን አጠቃላይ ሁኔታ ሲከታተሉ መቆየታቸውንና የአገሪቷ ወዳጅ መሆናቸውን ተናግረዋል።

 ሴናተር ጀምስ ኢትዮጵያ ውስጥ አስደናቂ ለውጦች መምጣታቸውን መታዛባቸውን ተናግረው አሜሪካም ጥሩ አጋሯ ናት ብለዋል።

 ኢትዮጵያ ከሌሎች የአፍሪካ አገራት ጋር ሲነጻጸር በተሻለ መልኩ የኢኮኖሚ   እድገት እያስመዘገበች መምጣቷን መገንዘባቸውንም አክለዋል።

 ኢትዮጵያና አሜሪካ ከሁለትዮሽ ኢኮኖሚያዊ ግንኙነት ባሻገር በቀጣናዊ ሰላምና መረጋጋት እንዲሁም ሽብርተኝነትን በመዋጋት ትብብራቸው ይታወቃሉ።

Published in ፖለቲካ

አዲስ አበባ ጥቅምት 2/2010 የአፍሪካ የውስጥ ገቢ አሰባሰብ እየተሻሻለ መቀጠሉን በአፍሪካ አገራት የገቢ አሰባሰብ ላይ የተደረገ ጥናት አመለከተ።

የአፍሪካ ታክስ አስተዳድር ፎረም፣ የአፍሪካ ሕብረት ኮሚሽንና ዓለም አቀፉ የኢኮኖሚ ትብብርና ልማት ድርጅት በጥምረት በአህጉሪቷ የ25 ዓመታት የገቢ መጠን መረጃን የያዘ የጥናት ሰነድ ዛሬ በአዲስ አበባ ይፋ ሆኗል።

ከአውሮፓ ሕብረት በተገኘ ድጋፍ በ2017 የታተመውና እ.አ.አ ከ1990-2015 አፍሪካ የነበራትን የገቢ አሰባሰብ የሚተነትነው ሰነድ ከ21 አገራት የተውጣጡ የፋይናንስና ግብር ባለሙያዎች በተገኙበት ነው ይፋ የተደረገው።

የጥናት ሰነዱ ከዚህ በፊት ይጠቀምበት ከነበረው የስምንት አገራት ናሙናን በእጥፍ ጨምሮ የ16 አገራትን መረጃ አጠቃሏል።

በዚህም የእያንዳንዱ አገር የግብር መጠን ለጥቅል ዓመታዊ የአገር ውስጥ ምርት ምጣኔ በአማካይ ያበረከተው ድርሻ እ.አ.አ በ2000 ከነበረው ጋር በመቶኛ ሲሰላ በአማካይ በ5 በመቶ ብልጫ እንዳለው ተጠቁሟል።

ከ2014 ከነበረው ደግሞ በ2015 በ 0 ነጥብ 4 በመቶ ያደገ ሲሆን በአገራቱ በግብር የተሰበሰበው ገቢ ለጥቅል የአገር ውስጥ ዓመታዊ ምርት ምጣኔ ያበረከተው ድርሻ 19 ነጥብ 1 በመቶ ደርሷል።

በተወሰዱት አገራት የጥናት ውጤት መሰረትም የአፍሪካ የውስጥ ገቢ አሰባሰብ እየተሻሻለ መቀጠሉን ነው ሪፖርቱ ያመለከተው።

ጥናቱ የውስጥ ግብር የሚሰበስብባቸውን ዘርፎች ያነጻጸረ ሲሆን ተጨማሪ እሴት ታክስን ጨምሮ ከምርትና አገልግሎት የተሰበሰበው ግብር መጠን በአማካይ 75 ነጥብ 2 በመቶ ድርሻ አለው።

ከገቢና ከትርፍ የተሰበሰበው የአገራቱ የገቢ መጠንም በአጠቃላይ ከግብር ለተሰበሰበው ገቢ መጠን በአማካይ 32 ነጥብ 4 በመቶ ድርሻ በመያዝ ከፍተኛ ድርሻ መያዙን ሪፖርቱ ጠቁሟል።

እንደየአገራቱ ነባራዊ ሁኔታ አንጻራዊ ልዩነት ቢኖረውም ከግብር የተሰበሰበው የገቢ መጠን ከግብር ውጪ ካሉ የገቢ ምንጮች ጋር ሲነጻጸር ብልጫ አለው።

ከግብር ውጪ የሚሰበሰብን ገቢ በተመለከተ ገቢው ለጥቅል ዓመታዊ የአገር ውስጥ ምጣኔ ያበረከተው ድርሻ በጥናቱ ከተካተቱ 14 አገራት መካከል የስምንቱ ካለፉት 10 ዓመታት ጀምሮ እየቀነሰ ሲሆን የስድስቱ ግን ጭማሪ ማሳየቱ ተገልጿል።

የአገራቱ የገቢ አሰባሰብ መጠን በግብር ስርዓት አወቃቅር አኳያ ከካሪቢያን አገራት ተመሳሳይ ቢሆንም የአፍሪካ ድርሻ ግን ያነሰ መሆኑ ተመልክቷል።

ሪፖርቱ ያካተታቸው አገራት ኬፕ ቨርዴ፣ ካሜሩን፣ ዴሞክራቲክ ሪፓብሊክ ኦፍ ኮንጎ፣ ኮት ዲቫር፣ ጋና፣ ኬንያ፣ ሞሪሸስ፣ ሞሮኮ፣ ኒጀር፣ ሩዋንዳ፣ ሴኔጋል፣ ደቡብ አፍሪካ፣ ቶጎ፣ ቱኒዚያና ዩጋንዳ ናቸው።

ከአገር ውስጥ ሀብት የሚሰበሰበው የገቢ መጠን መሻሻሉ የአገራቱን የመንግስት አስተዳደርና የንግድ አካባቢ ለማረጋጋት፣ የታክስ አሰባሰብ ፖሊሲና አስተዳደርን ለማጠናከርና ከውጭ እርዳታ ጥገኝነት ለመላቀቅ ትልቅ አስተዋጽኦ እንደሚኖረው በመድረኩ ላይ ተገልጿል።

 

Published in ኢኮኖሚ

ደብረ ማርቆስ ጥቅምት 2/2010 በምስራቅ ጎጃም ዞን የተከሰተውን አጣዳፊ ተቅማጥ እና ትውከት በሽታ ለመከላከልና ለመቆጣጠር በትኩረት እየተሰራ መሆኑን የዞኑ ጤና መምሪያ አስታወቀ።

በመምሪያው የህብረተሰብ ጤና አደጋዎች መከላከል የስራ ሂደት አስተባባሪ አቶ ንብረት በሪሁን ለኢዜአ እንደተናገሩት የአተት በሽታ በአሁኑ ወቅት በዞኑ 18 የገጠር ወረዳዎች ተከስቷል።

በሽታውን ለመከላከልና ለመቆጣጠር  ከዞን እስከ ወረዳ  አቢይ እና የቴክኒክ ኮሚቴ ተቋቁሞ የተጠናከረ ስራ እየተሰራ ነው።

በዞኑ በሚገኙ  ጤና ጣቢያዎች እና ሆስፒታሎች ከ100 በላይ  የአተት ህሙማን ህክምና መስጫ ማዕከል ተቋቁሞና የባለሙያና ቁሳቁስ ተሟልቶ ህክምናው እየተሰጠ እንደሚገኝ አስረድተዋል።

እሰካሁንም ከ140 በላይ የህብረተሰብ ክፍሎች በበሽታው ተይዘው ተገቢውን ህክምና በማግኘት ጤንነታቸው በመመለሱ ወደ ቤተቻው የተላኩ ሲሆን አራት ህሙማን አሁንም ህክምናውን በመከተታል ላይ ናቸው፡፡

ህብረተሰቡም የአካባቢውን ንጽህና በመጠበቅና ምግብን አብስሎ በመጠቀም ራሱንና ቤተሰቡን ከበሽታው መጠበቅ እንዳለበት አስገንዝበዋል፡፡

በሽታው ከተከሰተም ፈጥኖ ወደ ጤና ተቋማት መሄድና ለሚመለከተው አካል ጥቆማ መስጠት እንደሚገባ ተናግረዋል፡፡

የአዋበል ወረዳ የለጋ ጤና ጣቢያ ሀኪም ሲስተር የምስራች ይርጋ እንዳሉት በአካባቢያቸው ከመስከረም ወር አጋማሽ ጀምሮ ሁለት ሰዎች በበሽታው ተይዘው ወደ ማዕከሉ መምጣታቸውንና ተገቢው ህክምና ተደርጎላቸው ወደ ቤታቸው ተመልሰዋል።

በዚሁ ወረዳ የእነሞጨር ቀበሌ ኗሪ አቶ ፈንታሁን ደጉ እንዳሉት ''ህመሙ እንደጀመረኝ  ፈጥኘ  ወደ ጤና ጣቢያ በመምጣቴ ህይወቴን ለማትረፍ ችያለሁ'' ብለዋል።

 

 

Published in ማህበራዊ

ሚዛን ጥቅምት 2/2010 በቤንች ማጂ ዞን የሚገኙ የመስህብ ስፍራዎችን ማስተዋወቅ ፣መዳረሻዎችን ማልማትና መንከባከብ እንደሚገባ ተመለከተ፡፡

የአለም የቱሪዝም ቀን በዓል ትናንት በሸዋ ቤንች ወረዳ የመስህብ ስፍራዎችን በመጎብኘት ተከብሯል፡፡

ከበዓሉ ተሳታፊዎች መካከል አቶ አደመ ማሞ ለኢዜአ እንዳሉት በዞኑ የተለያዩ ተፈጥሯዊ ፣ ታሪካዊና ባህላዊ የመስህብ ስፍራዎች ቢኖሩም የመንገዱ ምቹ አለመሆን ጎብኚዎች  በቀላሉ ወደቦታው እንዳይሄዱ ምክንያት ሆኗል፡፡

የጎብኝዎች ማረፊያና መዝናኛ ቦታዎች በበቂ ሁኔታ አለመኖርም ሌላው ችግር መሆኑን ጠቁመዋል፡፡

" በየዓመቱ የቱሪዝም ቀን መከበሩ ሰዎች አካባቢያቸውን እንዲያውቁ ዕድል ይረጥርላቸዋል " ያሉት ደግሞ ሌላው የበዓሉ ተሳታፊ  አቶ ታፈሰ ኢቦ ናቸው፡፡

በአካባቢው የሚገኙ ተፈጥሯዊና ሰው ሰራሽ የቱሪዝም ሀብቶችን በማልማት የሀገር ውስጥና የወጭ ሀገር ዜጎች እንዲጎበኟቸው ማስተዋወቅ እንደሚገባም አመልክተዋል፡፡

አቶ ከድር ሼባ የተባሉት የበዓሉ ተሳታፊ በበኩላቸው የአለም የቱሪዝም ቀን በዞን ደረጃ መከበሩ የቱሪዝም ስፍራዎች እንዲለሙ መነሳሳትን እንደሚፈጥር ተናግረዋል፡፡

በዚህም  " መልማት የሚገባቸውን የቱሪዝም መዳረሻዎችን ለይቶ የማልማቱ ስራ ትኩረት ሊሰጠው ይገባል" ብለዋል፡፡

የዞኑ ባህል፣ ቱሪዝምና የመንግስት ኮሙዩኒኬሽን መምሪያ ኃላፊ አቶ ሀብታሙ ሲዝ እንደገለጹት በቤንች ማጂ 64 ሰው ሰራሽ፣ ተፈጥሯና ባህላዊ የመስህብ ስፍራዎች ይገኛሉ፡፡

ከእነዚህም መካከል የኦሞ ብሔራዊ ፓርክ፣ የሁሲቃና የወጀንታ ፍል ውሃ ስፍራዎች፣ የተለያዩ ብሔረሰቦች ባህላዊ እሴቶች የሚጠቀሱ ቢሆንም  የሚጠበቀውን ያህል ጥቅም ላይ አልዋሉም፡፡

የቱሪዝም ዘርፉን ማልማትና ማበልጸግ ለአካባቢው ብሎም ለሀገሪቱ ዕድገት የሚኖረው አስተዋጽኦ ከፍተኛ በመሆኑ በቀጣይ በትኩረት እንደሚሰራ ተናግረዋል፡፡

በተያዘው የበጀት ዓመት አራት የቱሪዝም መዳረሻዎችን ለማልማት መታቀዱን ያመለከቱት ኃላፊው በሚዛን አማን ከተማ ደረጃቸውን የጠበቁ ሎጂዎችና ሆቴሎች እየተገነቡ መሆናቸው የጎብኝዎችን ቁጥር እንደሚያሳድገውም ጠቅሰዋል፡፡

ባለፈው የበጀት ዓመት የቤንች ማጂ ዞንን የመስህብ ስፍራዎች ከጎበኙ የሃገር ውስጥና የውጭ ቱሪስቶች  ከ71 ሚሊዮን ብር በላይ ገቢ መገኘቱን አስታውሰዋል፡፡

Published in ኢኮኖሚ

አዳማ ጥቅምት 2/2010 በአዳማ ከተማ በህገ ወጥ መንገድ የተገኘ 337 ጃሪካን የምግብ ዘይትና አራት ኩንታል ቡና  መያዙን ፖሊስ አስታወቀ፡፡

 የምግብ ዘይቱ የተያዘው ትናንት በከተማው ወረዳ አንድ ቀበሌ ዜሮ ሰባት ልዩ ስሙ አራዳ ገበያ ማዕከል ተብሎ በሚጠራው ስፍራ የታርጋ ቁጥሩ ኮድ 3-41460 አ.አ የጭነት ተሽከርካሪ  ላይ ሲራገፍ ከህዝብ በደረሰ ጥቆማ ነው፡፡

በግለሰቦች መጋዘን ለማራገፍ ሲዘጋጅ የተያዘው የምግብ ዘይቱ መንግስት ከውጭ በድጎማ ለህብረተሰቡ ያሰገባው መሆኑን የአዳማ ከተማ ፖሊስ መምሪያ የህዝብ ግንኙነት ከፍተኛ ባለሙያ ረዳት ኢንስፔክተር ወርቅነሽ ገልሜቻ ዛሬ ገልጸዋል፡፡

 በግለሰቦች እጅ እንዴት ሊገባ እንደቻለ ለማጣራት ፖሊስ የምርምራ ስራውን መቀጠሉንም ጠቅሰዋል፡፡

 የምግብ ዘይቱ ባለ 20 ሊትር ጃሪካን ሲሆን ከ93 ሺህ ብር በላይ ግምት  ያለው መሆኑን ረዳት ኢንስፔክተር ወርቅነሽ ተናግረዋል፡፡

 በተጨማሪም  በከተማዋ ቀበሌ አስር  ልዩ ስሙ ፖስታ ቤት በተባለው አካባቢ በህገወጥ መንገድ የተገኘ አራት ኩንታል ቡና መያዙንም ጠቁመዋል፡፡

 የምግብ ዘይቱን የጫነው መኪና አሽከርካሪና ቡናው ተገኝቶባቸዋል ተብለው የተጠረጠሩ ግለሰቦች ለጊዜው ቢሰወሩም ፖሊስ ለመያዝ  ክትትል እያደረገ መሆኑን አመልክተዋል፡፡

 በአዳማ ከተማ ከዚህ ቀደምም በተለያዩ ጊዜያት በህገ ወጥ መንገድ የተገኘ የምግብ ዘይትና ቡና መያዙን በወቅቱ ተገልጿል፡፡

Published in ኢኮኖሚ

ጅግጅጋ ጥቅምት 2/2010 በጅግጅጋ ዩኒቨርስቲ ሰለማዊ የመማር ማስተማር ሂደትን በማጠናከር የተሻለ ውጤት ለማስመዝገብ ተግተው እንደሚሰሩ አስተያየታቸውን ለኢዜአ የሰጡ የዩኒቨርሲቲው ነባር  ተማሪዎች ገለጹ፡፡

ዩኒቨርሲቲው ከከተማው ነዋሪዎችና ከዩኒቨርሲቲው ማህበረሰብ አባላት ጋር በመሆን ለነባር ተማሪዎች ከትናንት ጀምሮ አቀባበል እያደረገ ነው፡፡

ከኦሮሚያ ክልል የመጣውና በዩኒቨርሲቲው የሁለተኛ ዓመት የሲቪል ኢንጅነሪንግ ተማሪ አህመድዲን አደን በሰጠው አስተያየት ዩኒቨርሲቲው ከከተማው ማህበረሰብ ጋር በመሆን ላደረገላቸው የእንኳን ደህና መጣችሁ አቀባበል መደሰቱን ገልጿል፡፡

"የጅግጅጋ ሕዝብ እንግዳ ተቀባይና ሰላም ወዳድ እንደሆነ ባለፈው አንድ ዓመት በሚገባ ተገንዝቢያለሁ፤ ዛሬም በተደረገው አቀባበል ያረጋገጥኩት ይህንኑ ነው" ብሏል፡፡

በዩኒቨርሲቲው አንዱ የሌላውን ባህል፣ ቋንቋና ማንነት አክብሮ በፍቅርና በሰላም ትምህርቱን እንደሚከታተል ገልፆ ይህ መልካም ተሞክሮ በዚህ ዓመትም ተጠናክሮ እንዲቀጥል የበኩሉን ጥረት እንደሚያደርግ ተናግሯል፡፡

ከትግራይ ክልል የመጣውና በዩኒቨርሲቲው የ3ኛ ዓመት የሶሺዮሎጂ ተማሪ ሄኖክ ገብረእግዚአብሄር በበኩሉ በመንገድ ላይ ምንም አይነት የጸጥታ ችግር እንዳላጋጠመውና በጅግጅጋ ከተማም ከዚህ ቀደም ከሚያውቀው የተለየ ሁኔታ አለመመልከቱን ገልጿል።

ከደቡብ ክልል ሶዶ አካባቢ የመጣውና የሁለተኛ ዓመት የሶፍትዌር ኢንጅነሪንግ ተማሪ አድማሱ አየለ  "በዩኒቨርሲቲው አቀባበል ከጠበቅኩት በላይ ሆኖ አግኝቻለሁ በዚህም ደስተኛ ነኝ" ብሏል፡፡

"እኔም ሆነ ቤተሰቤ ወደ ዩኒቨርሰቲው ስመጣ ስጋት ነበረብኝ፤ ሆኖም ከጅግጅጋ ከተማ እስከ ዩኒቨርሲቲው ቅጥር ግቢ የገጠመኝ ቤተሰባዊ አቀባበል ስጋትና ጭንቀቴን አስወግዶታል" በማለት ተናግሯል፡፡

በትምህርት ቆይታው የተሻለ ውጤት ለማምጣት ከሚያደርገው ጥረት በተጨማሪ በዩኒቨርሲቲው ያለው ሰላማዊ የመማር ማስተማር ሂደት ተጠናክሮ እንዲቀጥል  የበኩሉን ለመወጣት መዘጋጀቱን አስታውቋል፡፡

"በአካባቢያችን ጅግጅጋ ሳትደርሱ ችግር ሊገጥማችሁ ይችላል የሚል የስጋት ወሬ ነበር፤ ዛሬ እዚህ የተገነዘብኩት ፍጹም ተቃራኒና ሰላማዊ ነገር ነው" በማለት የተናገረው  ደግሞ ከደቡብ ክልል የመጣውና በዩኒቨርሲቲው የ5ኛ ዓመት ሀይድሮ ኤሌክትሪክ  ኢንጅነሪንግ ተማሪና በዩኒቨርሲቲው የተማሪዎች ተወካይ አንዱዓለም አስፋው ነው፡፡

"ሰላም ከሁሉም ይበልጣል፤ ለመማርም ሆነ ተመርቆ ለመውጣት ሰላም ወሳኝ በመሆኑ በትምህርት ቆይታዬ ለሰላምና ለትምህርቴ ቅድሚያ እሰጣለሁ" ብላል።

በዩኒቨርሲቲው የተማሪዎች አቀባበል ሥነ ሥርአት ላይ የተገኙትና የጅግጅጋ ከተማ ነዋሪ አቶ አብዲ ሙሴ ጅግጅጋ የተረጋጋች በመሆኗ ተማሪዎች ያለምንም ስጋት ትምህርታቸውን መከታተል እንደሚኖርባቸው ተናግረዋል፡፡

የጅግጅጋ ዩኒቨርሲቲ የተማሪዎች ዲን አቶ ዩሱፍ መሐመድ ዩኒቨርሲቲው በ2010 የትምህርት ዘመን ለሚቀበላቸው ነባርና አዲስ ተማሪዎች ከክረምቱ ጀምሮ በቂ ዝግጅት ሲያደርግ መቆየቱን ገልፀዋል።

የዩኒቨርሲቲው የአካዳሚክና ምርምር ምክትል ፕሬዚዳንት አቶ ኢልያስ ዑመር በበኩላቸው፣ ዩኒቨርሲቲው ከጅግጅጋ ከተማ አስተዳደር፣ ከከተማው የሃገር ሽማግሌዎችና ወጣቶች ጋር በመተባበር ለነባር ተማሪዎች አቀባበል እያደረገላቸው መሆኑን አስረድተዋል፡፡

በዘንድሮ የትምህርት ዘመንም ከሦስት ሺህ 500 በላይ አዲስ ተማሪዎችን ከጥቅምት 27 እስከ 29 ቀን 2010 ዓ.ም እንደሚቀበል አስታውቀዋል፡፡

Published in ማህበራዊ

አዲስ አበባ ጥቅምት 2/2010 በሰንደቅ ዓላማ አጠቃቀም ዙሪያ ለህብረተሰቡ የሚሰጠውን ግንዛቤ የማስጨበጥ ስራ እንደሚያጠናክር የፌዴራል ጠቅላይ አቃቢ ህግ ገለፀ።

የፌዴራል ጠቅላይ አቃቢ ህግና የተጠሪ ተቋማቱ ሠራተኞች 10ኛውን የሰንደቅ ዓላማ ቀን ዛሬ አክብረዋል።

ስለ ሰንደቅ ዓላማ ለህብረተሰቡ ግንዛቤ ማስጨበጥና የህግ ጥሰትን መቆጣጠር እንዲሁም ተገቢውን ምላሽ የመስጠት ኃላፊነትና ተግባር የፌዴራል ጠቅላይ አቃቢ ህግ ኃላፊነትና ተግባር ነው።

የጠቅላይ አቃቤ ህግ ፅህፈት ቤት ኃላፊ አቶ ማዕረጉ አሰፋ በሰንደቅ ዓላማ ዙሪያ የሚሰጡ ግንዛቤዎች መዳበር አለባቸው ብለዋል።

"በቂ ግንዛቤ ባልተሰጠበት ሁኔታ የሚከሰቱ ችግሮችን በደፈናው ወደ ህግ መውሰዱ አዋጭ አይደለም" ያሉት ኃላፊው በማወቅም ሆነ ባለማወቅ ሰንደቅ ዓላማን በትክክል በመጠቀም ረገድ የሚስተዋሉ ስህተቶችን ሁሉም አካል በተጠያቂነት ሊያስቆማቸው ይገባል ብለዋል።

የአቃቤ ህግና የህግ ጥናት ማስረፅ አስተባባሪ አቶ እንዳልካቸው ወርቁ በበኩላቸው በጊዜ ብዛት ያረጁ ሰንደቅ ዓላማዎችን መጠቀም ተገቢ እንዳልሆነና በህግ ተጠያቂ አንደሚያደርግ ተናግረዋል።

ሰንደቅ ዓላማን ከምሽቱ 12:00 ሠዓት በኋላ አለማውረድና ተጨማሪ ምልክቶችን ጨምሮ መጠቀም በአሁኑ ወቅት የሚስተዋሉ ችግሮች መሆናቸውንም ጠቁመዋል።

"ሰንደቅ ዓላማ የአገራት የሕዝቦች መታወቂያ ካርድ ወይም ምልክት ብቻ አይደለም" ያሉት አቶ እንዳልካቸው ህብረተሰቡ የማንነቱ መገለጫ መሠረት የሆነውን ሰንደቅ ዓላማ ህገ-መንግስቱ በሚደነግገው መሰረት በአግባቡ መጠቀም እንዳለበት አስገንዝበዋል።

የሴቶችና ህጻናት ጉዳይ ሚኒስቴር ሰራተኞችም በተመሳሳይ የሰንደቅ ዓላማን ቀን አክብረዋል።

የፌዴራል ስርዓቱ ለሴቶች እኩልነትና ለህጻናት መብት ያበረከተው አስተዋጽኦ የጎላ መሆኑንና በዓሉም የአገሪቱን ሠላም፣ ልማትና የዜጎች መብት መከበር ቀጣይነት የሚረጋገጥበት እንደሆነ በሚኒስቴሩ የህጻናት ዘርፍ ሚኒስትር ዴኤታ ወይዘሮ አለሚቱ ኡሞድ ተናግረዋል።

በመሆኑም በሰንደቅ ዓላማ ዙሪያ ለህብረተሰቡ የሚሰጠው ግንዛቤ የማስጨበጥ ተግባር ቀጣይነት ሊኖረው ይገባል ብለዋል።

የሚኒስቴሩ የህዝብ ግንኙነት ባለሙያ ወይዘሮ አበበች ተበጀ በበኩላቸው ሁሉም የህብረተሰብ ክፍል ለሰንደቅ ዓላማ የሚገባውን ክብር በመስጠት አገሪቱ የጀመረችውን ልማት የማስቀጠል ኃላፊነቱን መወጣት እንደሚጠበቅበት ተናግረዋል።

 

 

 

 

 

Published in ፖለቲካ
Page 1 of 4

ኢዜአ ፎቶ እይታ

በማህበራዊ ድረገፅ ይጎብኙን

 

የውጭ ምንዛሪ

<!-Foreign Exchange Rates widget - HTML code - fx-rate.net -->

<!-end of code-->