በኡጋንዳ ካምፓላ በተካሄደው 23ኛው የኔፓድ የመሪዎች ጉባኤ ላይ የተሰራጨው መረጃ መሰረተ ልማት፣ የሰው ኃይል ልማት፣ የግብርና ምርትና ምርታማነትን ማሳደግ፣ የምሁራን ፍልሰትን መከላከል፣ ባደጉ አገራት ለአፍሪካ ምርቶች ከፍተኛ ገበያ እንዲፈጠር ማድረግ እና የውጪ ቀጥታ ኢንቨሰትመንትን መሳብ ቅድሚያ ሊሰጣቸው የሚገቡ ዘርፎች እንደሆኑ ይፋ አድርጓል።

የኔፓድ ሊቀመንበር ጠቅላይ ሚኒስትር መለስ ዜናዊ የመሪዎቹን ጉባኤ በንግግር ሲከፍቱ እንዳሉት የኔፓድ እየተጠናከረ መሄድ በነዚህ ዘርፎች እየተካሄዱ ያሉ ትብብሮችን ውጤታማነት እያሳደገ ነው፡፡

ኔፓድን በአፍሪካ ህብረት ውስጥ በማዋሃድ በተቀናጀ መልኩ ለመንቀሳቀስ እየተካሄደ ያለው ተግባር ውጤታማ በሆነ መልኩ ከተጠናቀቀ አፍሪካን የአለም ኢኮኖሚ መዘውር አካል ለማድረግ ትልቅ ፋይዳ ይኖረዋል ሲሉ መግለጻቸውን ኢዜአ የኢትዮጵያ ሬዲዮና ቴሌቪዥን ድርጅትን ጠቅሶ ዘግቧል፡፡

የወቅቱ የአፍሪካ ህብረት ሊቀመንበር የማላዊው ፕሬዚዳንት ቢንጉዋ ሙታሪካ በበኩላቸው ኔፓድን በአፍሪካ ህብረት ውስጥ በማዋሃድ የምግብ ዋስትናን ለማረጋገጥ፣ የመሰረተ ልማት አውታሮችን በማስፋፋት ድህነትን ለማስወገድ የሚያስችል ጠንካራ አቅም ለመፍጠር ጥረት እየተደረገ መሆኑን አስረድተዋል፡፡

አፍሪካ የጀመረችውን ጥረት ስኬታማ ለማድረግም በቀጣዮቹ አምስትና አስር ዓመታት ጊዜ ውስጥ እውን ለማድረግ ከያዘችው ራእይ ጋር በተጣጣመ ሁኔታ መንቀሳቀስ ይገባል ብለዋል፡፡

በመሪዎቹ ጉባኤ ላይ የተገኙት የቀድሞው የእንግሊዝ ጠቅላይ ሚኒስትር ጎርደን ብራውን አፍሪካ በአለም አቀፉ ኢኮኖሚያዊ እንቅሰቃሴ ተጠቃሚ ብቻ ሳትሆን ዋነኛ ተዋናይ ጭምር መሆኗ በግልጽ መታየት መጀመሩን መስክረዋል፡፡

አህጉሪቱ ባለፉት ሁለት አስርት ዓመታት ብቻ ያስመዘገበችው እድገት በአንድ ምእት አመት ጊዜ ውስጥ ያልታየ ውጤት ነው ብለዋል፡፡

ጎርደን ብራውን እንደተናገሩት ማንኛውም አለም አቀፍ መድረክ ውጤታማ እንዲሆን ካስፈለገ የአፍሪካን ውክልናና ሃሳብ ከግንዛቤ ውስጥ መግባቱን ማረጋጋጥ ያስፈልጋል፡፡

---END---